গুৱাহাটী, ২৬ জানুৱাৰী ঃ ৩৮ সংখ্যক উত্তৰাখণ্ড ৰাষ্ট্ৰীয় ক্ৰীড়াত অংশ লোৱাৰ বাবে দেওবাৰে অসম অলিম্পিক সন্থাৰ বিষয়বৱীয়াৰ এটা দল গুৱাহাটীৰ পৰা ৰাওনা হৈছে৷ অসম অলিম্পিক সন্থাৰ সম্পাদক লক্ষ্য কোঁৱৰৰ নেতৃত্বত যোৱা দহজনীয়া দলটোত আছে ডেপুটি চিফ দ্য মিছন নিৰঞ্জন শইকীয়া, ভৱজ্যোতি গোস্বামী, অংশুমান দত্ত, ধ্ৰুৱজ্যোতি কলিতা, দেৱজিত গগৈ আদি৷
উল্লেখ্য যে ৰাষ্ট্ৰীয় ক্ৰীড়াৰ আৰম্ভ হোৱাৰ দুদিন পূৰ্বেই অসম অলিম্পিক সন্থাৰ দলটো উত্তৰাখণ্ডলৈ যোৱাৰ মুল কাৰণ হ’ল সম্পাদক কোঁৱৰে ৰাজ্যৰ খেলুৱৈৰ থকা-খোৱাৰ ব্যৱস্থাসমুহ নিজেই নিৰীক্ষন কৰিব৷ এইবাৰ ৰাষ্ট্ৰীয় ক্ৰীড়াত অসমে মুঠ ২২ বিধ খেলত অংশ ল’ব৷ খেলুৱৈ আৰু বিষয়াসহ প্ৰায় তিনিশজনীয়া এটা দল অসমৰ পৰা যাব৷ আনহাতে, ৰাষ্ট্ৰীয় ক্ৰীড়াৰ খেল উত্তৰাখণ্ডৰ এঘাৰটা বিভিন্ন স্থানত অনুষ্ঠিত হ’ব৷ সেয়েহে অসম অলিম্পিক সন্থাই ৰাজ্যৰ কোনো খেলুৱৈয়ে যাতে অসুবিধাৰ সন্মুখীন নহয় সেই দিশটো স্বয়ং নিজৰ প্ৰতিনিধিক যথা স্থানত ৰাখি চোৱা-চিতা কৰাব৷
‘অসমৰ মুখ্যমন্ত্ৰী ড॰ হিমন্ত বিশ্ব শৰ্মা মহাশয়ে আমাক নিৰ্দেশ দিছে যে ৰাজ্যৰ খেলুৱৈয়ে কোনো কাৰণতে প্ৰতিযোগিতাৰ সময়ত সমস্যাৰ সন্মুখীন হ’ব নালাগে৷ অসম অলিম্পিক সন্থাৰ সভাপতি তথা জ্যেষ্ঠ কেন্দ্ৰীয় মন্ত্ৰী সৰ্বানন্দ সোণোৱাল মহাশয়েও ৰাষ্ট্ৰীয় ক্ৰীড়াৰ সময়ত ক্ৰীড়াবিদৰ কাষত ২৪ ঘণ্টা অসম অলিম্পিক সন্থাৰ প্ৰতিনিধিক উপস্থিত থাকিবলৈ নিৰ্দেশনা দিছে৷ সেয়েহে আমি নিজেই সকলোখিনি তদাৰক কৰিম৷ অসম অলিম্পিক সন্থাৰ প্ৰতিনিধিয়ে নিষ্ঠাৰে এই দায়িত্ব পালন কৰিবলৈ সাজু৷’ সম্পাদক লক্ষ্য কোঁৱৰে অৱগত কৰে৷
ইফালে, আজি গুৱাহাটীৰ পৰা যোৱা অসম অলিম্পিক সন্থাৰ প্ৰতিনিধি দলটোৱে নতুন দিল্লীত অসম অলিম্পিক সন্থাৰ সভাপতি তথা জ্যেষ্ঠ কেন্দ্ৰীয় মন্ত্ৰী সৰ্বানন্দ সোণোৱালক সাক্ষাৎ কৰি খেলুৱৈৰ আগমন আৰু প্ৰস্থানৰ লগতে উত্তৰাখণ্ডত থকা-খোৱা সকলো ব্যৱস্থাৰ বিষয়ে অবগত কৰে৷ সম্পাদক কোঁৱৰে জনোৱা অনুসৰি সভাপতি সোণোৱালে যিকোনো অসুবিধা হ’লেই তাৎক্ষনিকভাবে তেওঁক অৱগত কৰিবলৈ জনাইছে৷
উল্লেখ্য যে পূৰ্ব গুজৰাট আৰু গোৱাৰ দৰেই এইবাৰো মুখ্যমন্ত্ৰী ড॰ হিমন্ত বিশ্ব শৰ্মাই ৰাষ্ট্ৰীয় ক্ৰীড়ালৈ যোৱা অসম দলটোক বিমানৰে অহা-যোৱা কৰাৰ ব্যৱস্থা কৰি দিছে৷ অসম চৰকাৰৰ ক্ৰীড়া বিভাগে খেলুৱৈৰ বাবে প্ৰশিক্ষণ শিবিৰো আয়োজন কৰিছে৷ একেদৰে অসম অলিম্পিক সন্থাই সভাপতি তথা জ্যেষ্ঠ কেন্দ্ৰীয় মন্ত্ৰী সৰ্বানন্দ সোণোৱালৰ নিৰ্দেশনাৰে ৰাজ্যৰ খেলুৱৈয়ে কোনো অসুবিধা নপোৱাৰ এক সুব্যৱস্থা কৰিছে৷ সম্পাদক কোঁৱৰৰ নেতৃত্বত বিগত এমাহ ধৰি ভোগালী বিহুৰ সময়তো সন্থাৰ বিষয়ববীয়াসকলে সৰুঙা নৰখাকৈ সকলোখিনি ব্যৱস্থা সম্পন্ন কৰিছে৷
উল্লেখ্য যে ৰাষ্ট্ৰীয় ক্ৰীড়াৰ শুভ উদ্বোধনী অহা ২৮ জানুৱাৰীত হ’ব যদিও ইতিমধ্যে খেল আৰম্ভ হৈছে৷ আজি ট্ৰাইথলন আৰম্ভ হোৱাৰ বিপৰীতে কাইলৈৰ পৰা বীচ্ছ হেণ্ডবল আৰম্ভ হ’ব৷ ইতিমধ্যে দুদিন পূৰ্বে উত্তৰাখণ্ডত উপস্থিত হৈছে অসম দলৰ আনজন ডেপুটি চিফ দ্য মিছন হীৰেন গগৈ৷ যিহেতু উত্তৰাখণ্ডত শীতৰ প্ৰকোপ বেছি সেয়েহে অসমৰ পৰা গৈ খেলুৱৈয়ে যাতে ঠাণ্ডাৰ পৰিবেশৰ লগত মিলিব পাৰে সকলো খেলুৱৈক খেলৰ দুদিন পূৰ্বে উপস্থিত হোৱাৰ ব্যৱস্থা কৰা হৈছে৷
এইবাৰৰ ৰাষ্ট্ৰীয় ক্ৰীড়াৰ ২৩৭ জনীয়া অসমৰ খেলুৱৈ দলত অলিম্পিয়ানৰ লগতে কমনৱেলথ আৰু এছিয়ান গেমছত পদক লাভ কৰা তথা প্ৰায় কুৰিজন দেশক প্ৰতিনিধিত্ব কৰা আন্তৰ্জাতিক এলিট ক্ৰীড়াবিদ আছে৷ বিগত গোৱা ৰাষ্ট্ৰীয় ক্ৰীড়াত অসমে ৫৬ টা পদক লাভ কৰি দ্বাদশ স্থানত আছিল৷ এইবাৰ অসমৰ প্ৰদৰ্শন উন্নত হ’ব বুলি আশাবাদী অসম দলৰ চিফ দ্য মিছন অভিজিত ভট্টাচাৰ্যৰ লগতে অসম অলিম্পিক সন্থা আৰু ৰাজ্যৰ ক্ৰীড়াপ্ৰেমী৷
