অসমৰ ডিমা হাছাও জিলাৰ উমৰাংছ’লৈ পুনৰ আগমন ঘটিবলৈ আৰম্ভ কৰিছে সুদূৰ চাইবেৰিয়া আৰু চীনৰ পৰা অহা পৰিভ্ৰমী চৰাই আমুৰ ফেলকনৰ। প্ৰতি বছৰে আফ্ৰিকালৈ যাত্ৰা কৰাৰ সময়ত এই ক্ষুদ্ৰ চিকাৰী চৰাইবোৰে উমৰাংছ’ অঞ্চলত কিছু সময়ৰ বাবে জিৰণি লয়। এই পৰিভ্ৰমী চৰাইৰ আগমনে অঞ্চলটোৰ প্ৰকৃতিপ্ৰেমী, চৰাই পৰ্যবেক্ষক আৰু পৰ্যটকসকলৰ মাজত বিশেষ উৎসাহৰ সৃষ্টি কৰিছে।
প্ৰতি বছৰে অক্টোবৰ আৰু নৱেম্বৰ মাহত উমৰাংছ’ত দেখা পোৱা আমুৰ ফালকনক ডিমাছা ভাষাত ‘দাওপানা’ আৰু কাৰ্বি ভাষাত ‘কালেংমাহা’ বুলি কোৱা হয়। পূব চাইবেৰিয়া আৰু উত্তৰ চীনৰ প্ৰজননস্থলীৰ পৰা আফ্ৰিকাৰ শীতকালীন বিচৰণভূমিলৈ যাত্ৰা কৰা এই চৰাইবোৰে দীঘলীয়া পৰিভ্ৰমণৰ সময়ত উত্তৰ-পূৰ্বাঞ্চলৰ বিভিন্ন অঞ্চলত সাময়িকভাৱে অৱস্থান কৰে।
সাধাৰণতে অক্টোবৰ মাহৰ শেষৰ ফালৰ পৰা নৱেম্বৰ মাহৰ আৰম্ভণিলৈ আমুৰ ফালকনৰ উপস্থিতি অধিক পৰিলক্ষিত হয়। অৱশ্যে বতৰৰ পৰিস্থিতি আৰু পৰিভ্ৰমণৰ সময়সূচী অনুসৰি ইহঁতৰ আগমন আৰু অৱস্থানৰ সময়ৰ কিছু তাৰতম্য ঘটিব পাৰে। এই সময়ছোৱাত চৰাই পৰ্যবেক্ষক, বন্যপ্ৰাণী ফটোগ্ৰাফাৰ আৰু প্ৰকৃতিপ্ৰেমীসকলৰ বাবে উমৰাংছ’ এক আকৰ্ষণীয় গন্তব্যস্থান হৈ পৰে।
আমুৰ ফালকনৰ এই বাৰ্ষিক আগমনে ডিমা হাছাও জিলাৰ পৰ্যটন উদ্যোগৰ বাবেও নতুন সম্ভাৱনাৰ সৃষ্টি কৰিছে। পৰিভ্ৰমী চৰাইৰ উপস্থিতিক কেন্দ্ৰ কৰি অঞ্চলটোত প্ৰকৃতি পৰ্যটনৰ বিকাশৰ যথেষ্ট অৱকাশ আছে। এই উদ্দেশ্যে ডিমা হাছাও স্বায়ত্তশাসিত পৰিষদে সাধাৰণতে নৱেম্বৰ অথবা ডিচেম্বৰ মাহত আমুৰ ফেলকন মহোৎসৱৰ আয়োজন কৰি আহিছে। এই মহোৎসৱৰ জৰিয়তে জিলাখনৰ প্ৰাকৃতিক সৌন্দৰ্য, চহকী সাংস্কৃতিক ঐতিহ্য আৰু পৰ্যটনস্থলীসমূহক অধিক পৰিচিত কৰাৰ প্ৰয়াস কৰা হয়।
কেৱল পৰ্যটনেই নহয়, আমুৰ ফালকনৰ আগমনে জৈৱ-বৈচিত্ৰ্য সংৰক্ষণৰ গুৰুত্বও পুনৰ উন্মোচিত কৰিছে। পৰিভ্ৰমণৰ সময়ত এই চৰাইবোৰে যাতে নিৰাপদে জিৰণি ল’ব পাৰে, তাৰ বাবে প্ৰাকৃতিক বাসস্থান সংৰক্ষণ, চিকাৰ ৰোধ আৰু জনসচেতনতা বৃদ্ধিৰ প্ৰয়োজনীয়তা আছে।
প্ৰকৃতিৰ এই অনন্য পৰিঘটনাই উমৰাংছ’ক পৰিভ্ৰমী চৰাইৰ এক উল্লেখযোগ্য আকৰ্ষণস্থলী হিচাপে তুলি ধৰাৰ লগতে ডিমা হাছাও জিলাৰ পৰ্যটনৰ সম্ভাৱনাকো নতুন মাত্ৰা প্ৰদান কৰিছে। আমুৰ ফেলকনৰ সুৰক্ষা আৰু সংৰক্ষণৰ জৰিয়তে এই প্ৰাকৃতিক সম্পদ ভৱিষ্যৎ প্ৰজন্মৰ বাবেও সুৰক্ষিত কৰি ৰখাটো সকলোৰে দায়িত্ব।
