গুৱাহাটী, ৩ জুলাই, NKTV:বলীউডৰ চুপাৰষ্টাৰ আমিৰ খান আৰু কিৰণ ৰাৱে বিবাহৰ ১৫ বছৰৰ পিছত তেওঁলোকৰ বিচ্ছেদৰ কথা ঘোষণা কৰিছে। দম্পতীটোৱে সংবাদ মাধ্যমলৈ এটা যুটীয়া বিবৃতি প্ৰেৰণ কৰি এই কথা অৱগত কৰিছে।
“বিগত ১৫ টা বছৰ আমি জীৱনজোৰা অভিজ্ঞতা, আনন্দ আৰু হাঁহিৰ মাজেৰে অতিবাহিত কৰিছো আৰু আমাৰ সম্পৰ্ক কেৱল বিশ্বাস, সন্মান আৰু প্ৰেমৰ বাবেহে বৃদ্ধি পাইছে। এতিয়া আমি আমাৰ জীৱনৰ এক নতুন অধ্যায় আৰম্ভ কৰিব বিচাৰো – এতিয়া স্বামী আৰু পত্নী হিচাপে নহয়,” বিবৃতিটোত কোৱা হৈছে।
“আমি আমাৰ পুত্ৰ আজাদৰ প্ৰতি সমৰ্পিত পিতৃ-মাতৃ হৈ আছোঁ, যাক আমি একেলগে প্ৰতিপালন আৰু ডাঙৰ-দীঘল কৰিম। আমি চলচ্চিত্ৰ, পানী ফাউণ্ডেচন আৰু অন্যান্য প্ৰকল্পত সহযোগী হিচাপে কাম কৰি যাম যাৰ বিষয়ে আমি উৎসাহী অনুভৱ কৰোঁ,” বিবৃতিটোত উল্লেখ কৰা হৈছে।
দম্পতীটোৱে তেওঁলোকৰ এই সিদ্ধান্তত সমৰ্থনৰ বাবে তেওঁলোকৰ পৰিয়াল আৰু বন্ধুবৰ্গক ধন্যবাদ জনাইছে। “আমাৰ সম্পৰ্কত এই বিৱৰ্তনৰ বিষয়ে নিৰন্তৰ সমৰ্থন আৰু বুজাবুজিৰ বাবে আমাৰ পৰিয়াল আৰু বন্ধুবৰ্গক ধন্যবাদ।
আমি আমাৰ শুভাকাংক্ষীসকলক শুভকামনা আৰু আশীৰ্বাদৰ বাবে অনুৰোধ জনাইছো আৰু আশা কৰোঁ যে – আমাৰ দৰে – আপুনি এই বিবাহ বিচ্ছেদক সমাপ্তি হিচাপে নহয়, এক নতুন যাত্ৰাৰ আৰম্ভণি হিচাপে দেখিব,” বিবৃতিটোত কোৱা হৈছে।
