চীনৰ তিয়ানজিন বিশ্বৰ কূটনৈতিক ক্ষেত্ৰৰ এক নতুন অধ্যায়ৰ সাক্ষী হৈ ৰ’ল। শাংহাই সহযোগিতা সংগঠনৰ (এছচিঅ’) শীৰ্ষ সন্মিলনৰ মঞ্চত ভাৰতৰ প্ৰধানমন্ত্ৰী নৰেন্দ্ৰ মোদী, ৰাছিয়াৰ ৰাষ্ট্ৰপতি ভ্লাদিমিৰ পুটিন আৰু আয়োজক দেশ চীনৰ ৰাষ্ট্ৰপতি জিনপিঙে একেলগে উপস্থিত হৈছিল। গ্ৰুপ ফটো ছেশ্যনৰ সময়ত এছচিঅ’ৰ সকলো সদস্য তথা দেশৰ নেতা একেলগে একে মঞ্চত ঠিয় হৈছিল। এছচিঅ’ মঞ্চত যেতিয়া প্ৰধানমন্ত্ৰী মোদী উপস্থিত হৈছিল, তেতিয়া চীনৰ ৰাষ্ট্ৰপতি জিনপিঙে তেওঁক আদৰণি জনাইছিল। এই সময়ত জিনপিঙৰ পত্নী পেং লিয়ানো তাত উপস্থিত আছিল। ফটো ছেশ্যনৰ পিছত মোদীয়ে জিনপিঙ আৰু তেওঁৰ পত্নীৰ সৈতে হাত মিলাইছিল।
সেই সময়ত দুয়োজন নেতাৰ মুখত হাঁহি দেখা গৈছিল। মোদী আৰু পুটিনৰ মাজত তাজিকিস্তান আৰু কিৰ্গিজস্তানৰ ৰাষ্ট্ৰপতিদ্বয় আছিল। এছচিঅ’ৰ গোট ফটো ছেশ্যনৰ ওপৰত সমগ্ৰ বিশ্বৰ দৃষ্টি আছিল। জিনপিঙৰ সৈতে সাক্ষাতৰ পিছত মোদীয়ে মালদ্বীপ, নেপালৰ লগতে আন কেইবাখনো দেশৰ নেতাৰ সৈতে সাক্ষাৎ কৰিছিল। সাত বছৰৰ পিছত চীনলৈ গৈছে প্ৰধানমন্ত্ৰী মোদী। দহ মাহৰ ভিতৰত জিনপিঙৰ সৈতে এইটো তেওঁৰ দ্বিতীয়টো সাক্ষাৎ। পূৰ্বৰ সাক্ষাৎ ২০২৪ চনৰ ব্ৰিক্স শীৰ্ষ সন্মিলনত (কাজান, ৰাছিয়া) হৈছিল।
বিশ্ব ব্যৱস্থাত এই সাক্ষাৎ এক মাইলৰ খুঁটি হ’ব পাৰে!
বিশেষজ্ঞসকলৰ মতে, এই সাক্ষাৎ বিশ্ব ব্যৱস্থাত এটা মাইলৰ খুঁটি হ’ব পাৰে। কিন্তু ভাৰত, ৰাছিয়া আৰু চীনৰ মাজত সদায় কিছুমান বিপৰীতমুখীতা আছে। এই সাক্ষাতৰ পিছত ট্ৰাম্পৰ শুল্কৰ ধুমুহা উৰি যায় নে নাই, সেয়াহে লক্ষণীয় হ’ব। যদি এনেকুৱা হয়, তেন্তে ভাৰতৰ জয়-জয়কাৰ হ’ব। কিন্তু বিশেষজ্ঞসকলৰ আন এটা মতামত হৈছে যে, এই সাক্ষাতৰ পিছত যদি ভাৰত-চীনৰ মাজৰ মূল বিষয়বোৰ, যেনে চীনে পাকিস্তানক সমৰ্থন বন্ধ কৰে, ভাৰতৰ ভূমি ঘূৰাই দিয়ে, আদি সমাধান হয়, তেন্তে সেয়া ভাল হ’ব।
এছচিঅ’ শীৰ্ষ সন্মিলনত ট্ৰাম্পৰ তীক্ষ্ণ দৃষ্টি
ট্ৰাম্পে ভাৰতৰ ওপৰত ৫০ শতাংশ শুল্ক আৰোপ কৰাৰ পিছত এই শীৰ্ষ সন্মিলনক অতি গুৰুত্বপূৰ্ণ বুলি গণ্য কৰা হৈছে, কাৰণ ট্ৰাম্পৰ বাহিৰে অন্য সকলো মহাশক্তি এই মঞ্চত একেলগে উপস্থিত আছিল। শেহতীয়াকৈ ভাৰত আৰু চীনৰ মাজত বৃদ্ধি পোৱা ঘনিষ্ঠতাই আমেৰিকাক যথেষ্ট অস্থিৰ কৰিছে। ইয়াৰ আঁৰৰ মূল কাৰণ হৈছে ৰাছিয়াৰ তেল। আমেৰিকাই নিবিচাৰে যে, ভাৰতে ৰাছিয়াৰ পৰা তেল ক্ৰয় কৰক। শেহতীয়াকৈ আমেৰিকাই এই বিষয়ে আপত্তি উত্থাপন কৰিছিল। আমেৰিকাৰ মতে, ভাৰতে ৰাছিয়াৰ পৰা সস্তীয়া তেল ক্ৰয় কৰি ডাঙৰ মুনাফা অৰ্জন কৰিছে। ইয়াৰ প্ৰত্যুত্তৰত ভাৰতে কঠোৰ প্ৰতিক্ৰিয়া প্ৰকাশ কৰিছিল।
ভাৰতে প্ৰতিবাদ জনাই কৈছিল যে, এই ক্ৰয় বিশ্ব বজাৰৰ পৰিস্থিতিৰ ওপৰত ভিত্তি কৰি কৰা হৈছে। ভাৰতে এইটোও কৈছিল যে, ৰাছিয়াৰ তেল ক্ৰয় কৰি তেওঁলোকে বিশ্বৰ তেলৰ মূল্য স্থিৰ কৰাত সহায় কৰিছে। আমেৰিকা আৰু ইউৰোপীয় দেশসমূহে নিজেই এই পদক্ষেপৰ প্ৰশংসা কৰিছিল। ভাৰতে স্পষ্ট কৰিছিল যে, তেওঁলোকে নিজৰ শক্তিৰ প্ৰয়োজনীয়তা আৰু জাতীয় স্বাৰ্থক অগ্ৰাধিকাৰ দিছে আৰু ৰাছিয়াৰ পৰা তেল ক্ৰয় কৰা কাৰ্য অব্যাহত ৰাখিব।
