নাছাৰ পার্ছেভাৰেঞ্চ ৰ’ভাৰে অৱশেষত দুটাকৈ শিলৰ নমুনা সংগ্রহ কৰিবলৈ সক্ষম হৈছে মঙল গ্ৰহত৷ বিগত কিছুদিন ধৰি শিলৰ নমুনা সংগ্রহত পার্ছেভাৰেঞ্চ ৰ’ভাৰ ব্যর্থ হ’লেও যোৱা ৬ ছেপ্তেম্বৰত প্রথমটো শিলৰ নমুনা সংগ্রহ কৰিবলৈ সক্ষম হোৱাৰ পিছত আঠ ছেপ্তেম্বৰতো আন এটা শিলৰ টুকুৰা সংগ্রহ কৰে। ৬ ছেপ্টেম্বৰত সংগ্রহ কৰা শিলৰ নমুনাটোৰ নাম ‘মণ্টডেনিয়াৰ’ আৰু ৮ ছেপ্টেম্বৰত সংগ্রহ কৰা দ্বিতীয়টো শিলৰ টুকুৰাৰ নাম ‘মণ্টাগনেক’৷
এই সংগৃহীত শিলৰ নমুনাৰ বিতং অধ্যয়নৰ জৰিয়তে মঙল গ্ৰহত জীৱৰ অস্বিত্বৰ সম্ভেদ লাভ কৰাৰ সম্ভাৱনা আছে। নাছাৰ মঙল অভিযানৰ প্রকল্প বিজ্ঞানী কেন ফার্লিয়ে প্রকাশ কৰা মতে, প্রথম শিলৰ নমুনাত জীৱৰ বসবাস কৰা পৰিৱেশৰ সম্ভাৱনা আছে। দক্ষিণ কেলিফ’র্নিয়াৰ নাছাৰ জেট প্রপালছন লেবৰেটৰীৰ বিজ্ঞানীজনে শিলৰ নমুনাত দীর্ঘদিন ধৰি বিজ্ঞানীসকলে ধাৰণা কৰি অহা পানীৰ সম্ভেদো লাভ কৰাৰ সম্ভাৱনা আছে বুলি কয়।
