বিয়াৰ প্ৰলোভনেৰে বহি:ৰাজ্যলৈ সৰবৰাহ অসমৰ কিশোৰী

গুৱাহাটী, ১০ আগষ্ট, NKTV: অসমত পুনৰ সক্ৰিয় হৈ উঠিছে নাৰী ব্যৱসায় চক্ৰ৷ নগাঁৱৰ কচুৱাত ৰাজস্থানৰ নাৰী ব্যৱসায় চক্ৰ আটক৷ বিয়াৰ প্ৰলোভনেৰে অসমৰ পৰা বহি:ৰাজ্যলৈ সৰবৰাহ হয় বহু কিশোৰী যুৱতী৷ নগাঁৱৰ কচুৱাত ৰাইজৰ হাতত আটক হ’ল মহিলা সহ চাৰিজন নাৰী ব্যৱসায় চক্ৰৰ লগত জড়িত থকা ব্যক্তি৷ সুদুৰ ৰাজস্থানৰ পৰা আহি নাৰী ব্যৱসায় কৰা এটা কুখ্যাত চক্ৰক কচুৱাৰ পণ্ডিটঘাটৰ ৰাইজে আটক কৰি কচুৱা আৰক্ষীক চমজাই দিয়ে ৷ আটকাধীন নাৰী ব্যৱসায় চক্ৰৰ লোক কেইজন ক্ৰমে ৰাজস্থানৰ মুকেশ কুমাৰ, ৰাকেশ কুমাৰ, নগাঁৱৰ ৰাম বাবু আৰু ৰামধাৰী দেৱী বুলি জানিব পৰা গৈছে ৷ জানিব পৰা মতে ৰাজস্থানৰ মুকেশ কুমাৰ আৰু ৰাকেশ কুমাৰে নগাঁৱৰ ৰামধাৰী দেৱী আৰু পূজাৰী ৰাম বাবুৰ সহযোগত কচুৱা পণ্ডিটঘাটৰ এটি দৰিদ্ৰ পৰিয়ালৰ এগৰাকী চৈধ্য বছৰীয়া কিশোৰীক বিয়াৰ প্ৰলোভন দিয়ে৷ নৱম শ্ৰেণীৰ ছাত্ৰী গৰাকীক সোমবাৰে আনুষ্ঠানিকভাৱে বিয়া কৰাবলৈ আহিছিল যদিও সচেতন ৰাইজৰ জেৰাৰ ফলত চক্ৰটোৰ সকলো ৰহস্য ফাদিল হৈ পৰে৷ যোৱা সপ্তাহত নাৰী ব্যৱসায়ী চক্ৰটোয়ে ছাত্ৰী গৰাকীৰ পিতৃক বিয়াৰ বাবদ দহ হাজাৰ টকা দি গৈছিল৷ পূজাৰী ৰামবাবু আৰু মহিলা সৰবৰাহকাৰী ৰামধাৰী দেৱীক লগত লৈ দৰা ৰাজস্থানৰ মুকেশ কুমাৰৰ লগতে বন্ধু ৰাকেশ কুমাৰ সোমবাৰে কইনাৰ ঘৰত উপস্থিত হয়৷ নাবালিকা কইনাই কথাটো গম পাই স্থানীয় লোকক অৱগত কৰাত তৎক্ষণাত পণ্ডিটঘাট আৰু শিঙিমাৰীৰ গাওঁৰক্ষী বাহিনীৰ সম্পাদকে ৰাইজৰ সহযোগত চক্ৰটোৰ এগৰাকী মহিলা সহ চাৰিজনক আটক কৰি আৰক্ষীক চমজাই দিয়ে ৷ কচুৱা আৰক্ষীয়ে এটা গোচৰ ৰুজু কৰি জেৰা অব্যাহত ৰাখিছে। উল্লেখযোগ্য যে, চক্ৰটোৰ পৰা আৰক্ষীয়ে সেন্দুৰৰ টেমা, ফুলৰ মালা আদি উদ্ধাৰ কৰে৷ জানিব পৰা মতে ধৃত নাৰী ব্যৱসায় চক্ৰটোয়ে দীৰ্ঘদিন ধৰি দৰিদ্ৰ পৰিয়ালৰ কিশোৰী যুৱতীক বিয়াৰ প্ৰলোভন দি ৰমৰমীয়া ব্যৱসায় কৰি আহিছিল।