যোৱা দুসপ্তাহ ধৰি য়েমেনৰ হোদেইদা আৰু ছানাত আৱদ্ধ হৈ থকা ১৯ গৰাকী ভাৰতীয় নাবিকক নিৰাপদে উদ্ধাৰ কৰা হৈছে। আটাইকেইগৰাকী নাবিক সুস্থ অৱস্থাত আছে আৰু স্বদেশ ভাৰতলৈ প্ৰত্যাৱৰ্তন কৰিব।
য়েমেনস্থিত ভাৰতীয় দূতাৱাসে প্ৰকাশ কৰে যে আটাইকেইগৰাকী নাবিক নিৰাপদে আছে, তেওঁলোকৰ স্বাস্থ্যৰ অৱস্থা ভাল আৰু তেওঁলোক ভাৰতলৈ উভতি আহিব।
সামাজিক মাধ্যমত প্ৰকাশ কৰা এটা পোষ্টৰ জৰিয়তে দূতাৱাসে আৱদ্ধ ভাৰতীয় নাগৰিকসকলক নিৰাপদে উদ্ধাৰ কৰি উভতাই অনাৰ ক্ষেত্ৰত সহযোগিতা আগবঢ়োৱা সকলো পক্ষক তেওঁলোকৰ মূল্যৱান সহযোগিতা আৰু নিৰন্তৰ সমৰ্থনৰ বাবে ধন্যবাদ জ্ঞাপন কৰে।
উল্লেখ্য যে, য়েমেনৰ উপকূলৰ সমীপত সংঘটিত এটা ঘটনাৰ সৈতে জড়িত এখন য়ট (Yacht)ত ১৪ গৰাকী ভাৰতীয় নাগৰিক নিৰাপদে থকাৰ কথা ভাৰতে ঘোষণা কৰাৰ কেইদিনমান পিছতে এই উদ্ধাৰ অভিযান সম্পন্ন হয়।
অৱশ্যে, য়টখনত থকা উক্ত ১৪ গৰাকী ভাৰতীয় নাগৰিক উদ্ধাৰ হোৱা ১৯ গৰাকী নাবিকৰ ভিতৰত আছে নে নাই, সেই কথা এতিয়াও স্পষ্ট হোৱা নাই।
ইয়াৰ পূৰ্বে, ২৩ অক্টোবৰত ভাৰতীয় দূতাৱাসে প্ৰকাশ কৰিছিল যে হোদেইদাৰ সমীপত থকা এখন য়টত থকা আটাইকেইগৰাকী ভাৰতীয় নাগৰিক নিৰাপদে আছে। লগতে, ঘটনাটোৰ প্ৰকৃত পৰিস্থিতি জানিবলৈ সংশ্লিষ্ট পক্ষসমূহৰ সৈতে যোগাযোগ অব্যাহত ৰখা হৈছে বুলিও দূতাৱাসে জনাইছিল।
