তামুলপুৰ জিলাৰ গড়গড়ীত সংঘটিত হৈছে এক চাঞ্চল্যকৰ হত্যাকাণ্ড। শহুৰেকৰ ঘৰত আলহী খাবলৈ গৈ দলবদ্ধ আক্ৰমণৰ বলি হৈ প্ৰাণ হেৰুৱালে ২৭ বছৰীয়া যুৱক ইকবাল হুছেইনে।
জানিব পৰা মতে, তামুলপুৰৰ শালমাৰাৰ বাসিন্দা ইকবাল হুছেইন ডুবাইত কৰ্মৰত আছিল। প্ৰায় ২০ দিন পূৰ্বে গড়গড়ীৰ জমিৰ আলীৰ কন্যাৰ সৈতে বিবাহপাশত আবদ্ধ হৈছিল তেওঁ।
আজি ডুবাইলৈ উভতি যোৱাৰ কথা আছিল ইকবালৰ। সেয়ে যোৱাৰ পূৰ্বে নিশা শহুৰেকৰ ঘৰত ভাত খাবলৈ গৈছিল যুৱকজন। কিন্তু নিশা শহুৰেকৰ ঘৰৰ পৰা নিজৰ ঘৰলৈ উভতি যোৱাৰ সময়তে একে গাঁৱৰে ওমৰ আলীৰ নেতৃত্বত এটা দলে তেওঁক আগুৰি ধৰি চোকা অস্ত্ৰৰে আক্ৰমণ কৰাৰ অভিযোগ উত্থাপন হৈছে।
এই আক্ৰমণত ইকবালৰ মূৰ আৰু শৰীৰৰ বিভিন্ন অংশত গুৰুতৰ আঘাত লাগে। ঘটনাৰ খবৰ পাই শহুৰেকৰ পৰিয়ালৰ লোক আৰু স্থানীয় গাঁওবাসীয়ে ততাতৈয়াকৈ তেওঁক গুৱাহাটীৰ এখন ব্যক্তিগত চিকিৎসালয়ত ভৰ্তি কৰায়।
কিন্তু আঘাত গুৰুতৰ হোৱাৰ ফলত আজি পুৱা চিকিৎসাধীন অৱস্থাতে যুৱকজনৰ মৃত্যু হয়।
ইফালে, ঘটনাৰ খবৰ লাভ কৰাৰ পিছতে তামুলপুৰ আৰক্ষীৰ এটা দল ঘটনাস্থলীত উপস্থিত হৈ তদন্ত আৰম্ভ কৰে। আৰক্ষীয়ে ঘটনাস্থলীৰ পৰা চোকা অস্ত্ৰ-শস্ত্ৰ জব্দ কৰিবলৈ সক্ষম হয়। অৱশ্যে মূল অভিযুক্ত ওমৰ আলীসহ আন অভিযুক্তসকলে ঘটনাস্থলীৰ পৰা পলায়ন কৰে।
নৱবিবাহিত যুৱকজনৰ এনে কৰুণ মৃত্যুৰ ঘটনাই সমগ্ৰ অঞ্চলটোতে শোক আৰু চাঞ্চল্যৰ সৃষ্টি কৰিছে। হত্যাকাণ্ডৰ আঁৰৰ কাৰণ জানিবলৈ আৰক্ষীৰ তদন্ত অব্যাহত আছে।
