উত্তৰ প্ৰদেশৰ কানপুৰৰ হনুমন্ত বিহাৰ আৰক্ষী থানাৰ অন্তৰ্গত অঞ্চলত ৩৭ বছৰীয়া এজন লোকৰ ৰহস্যজনক মৃত্যুক কেন্দ্ৰ কৰি চাঞ্চল্যৰ সৃষ্টি হৈছে। পৰিয়ালৰ লোকে এয়া দুৰ্ঘটনা নহয়, বৰং পৰিকল্পিত হত্যাকাণ্ড বুলি অভিযোগ উত্থাপন কৰিছে। পৰিয়ালৰ অভিযোগৰ ভিত্তিত আৰক্ষীয়ে গোচৰ ৰুজু কৰি তদন্ত আৰম্ভ কৰিছে।
পৰিয়ালৰ অভিযোগ অনুসৰি, পুৰণি শত্ৰুতাৰ বাবে কেইজনমান যুৱকে প্ৰথমে গাড়ীৰে বীৰু সিং ভদৌৰিয়াক খুন্দা মাৰে আৰু তাৰ পিছত তেওঁক মাৰপিট কৰে। পৰৱৰ্তী সময়ত তেওঁৰ দুয়োখন হাত গাড়ীৰ খিৰিকীৰ আইনাত আবদ্ধ কৰি গাড়ীৰ ছাদত তুলি প্ৰায় ১.৫ কিলোমিটাৰ পথ তীব্ৰ গতিত চোঁচৰাই নিয়াৰ অভিযোগ উঠিছে।
পৰিয়ালৰ ভাষ্য অনুসৰি, বীৰু সিং ভদৌৰিয়া এটা খাদ্য সামগ্ৰী প্ৰস্তুতকাৰী প্ৰতিষ্ঠানত বিক্ৰেতা হিচাপে কৰ্মৰত আছিল। এখন মেলাৰ পৰা ঘৰলৈ উভতি অহাৰ সময়তে মেৱালাল নামৰ এজন লোক গাড়ী এখন লৈ তাত উপস্থিত হয়। পৰিয়ালৰ অভিযোগ অনুসৰি, গাড়ীখনত ৰাজবীৰসহ আন তিনিজন যুৱকো আছিল।
অভিযোগ অনুসৰি, যুৱককেইজনে বীৰুক বাটতে আগচি ধৰি মাৰপিট কৰে। তেওঁ পলায়নৰ চেষ্টা কৰাত অভিযুক্তসকলে গাড়ীৰে খুন্দা মাৰে। তাৰ পিছত তেওঁক গাড়ীৰ ছাদত তুলি লৈ যোৱা বুলি পৰিয়ালৰ লোকে অভিযোগ কৰিছে।
ঘটনাৰ পিছত পথচাৰীয়ে আৰক্ষী আৰু বীৰুৰ পৰিয়ালৰ লোকক খবৰ দিয়ে। আহত অৱস্থাত তেওঁক চিকিৎসালয়লৈ লৈ যোৱা হয় যদিও চিকিৎসকে তেওঁক মৃত ঘোষণা কৰে। বীৰুৰ মৃত্যুৰ পিছত পৰিয়ালৰ লোকে এয়া সাধাৰণ দুৰ্ঘটনা বুলি মানি ল’বলৈ অস্বীকাৰ কৰি হত্যাকাণ্ডৰ অভিযোগ উত্থাপন কৰে। লগতে ঘটনাৰ সৈতে জড়িতসকলৰ বিৰুদ্ধে কঠোৰ ব্যৱস্থা গ্ৰহণৰ দাবী জনায়।
পৰিয়ালৰ লোকে আৰক্ষীক জনোৱা অনুসৰি, সমগ্ৰ ঘটনাটো ১২টাতকৈও অধিক চিচিটিভি কেমেৰাত বন্দী হৈছে। তেওঁলোকে ঘটনাটোৰ উচিত তদন্ত আৰু অভিযুক্তসকলৰ বিৰুদ্ধে কঠোৰ ব্যৱস্থা গ্ৰহণৰ দাবী জনায়।
আনহাতে, এচিপি অভিষেক ৰাহুলে জানিবলৈ দিয়ে যে ২১ অক্টোবৰত প্ৰদীপ শুক্লা নামৰ অভিযোগকাৰীয়ে হনুমন্ত বিহাৰ আৰক্ষী থানাত লিখিত অভিযোগ দাখিল কৰিছিল। অভিযোগ অনুসৰি, এখন অচিনাক্ত বাহনৰ খুন্দাত বীৰুৰ মৃত্যু হৈছিল।
এচিপিগৰাকীয়ে কয় যে বৰ্তমান ঘটনাটোৰ তদন্ত চলি আছে আৰু তদন্তত লাভ কৰা তথ্যৰ ভিত্তিত পৰৱৰ্তী আইনী ব্যৱস্থা গ্ৰহণ কৰা হ’ব।
ইফালে, ঘটনাটোৰ এটা ভিডিঅ’ ছ’চিয়েল মিডিয়াত ভাইৰেল হৈছে। আৰক্ষীয়ে তদন্তৰ অংশ হিচাপে ভিডিঅ’টোৰ সত্যতা আৰু ইয়াত বন্দী হোৱা দৃশ্যসমূহ পৰীক্ষা কৰি আছে।
