গুৱাহাটী, ২৯ জুন, NKTV: সোমবাৰে ভাৰতীয় ক্ৰিকেট নিয়ন্ত্ৰণ ব’ৰ্ডৰ (বিচিচিআই) পৰা আনুষ্ঠানিকভাৱে নিশ্চিত হোৱাৰ পিছত, আইচিচিয়ে ঘোষণা কৰে যে অক্টোবৰত আৰম্ভ হ’বলগীয়া পুৰুষৰ টি-২০ বিশ্বকাপ সংযুক্ত আৰৱ আমিৰাত আৰু ওমানলৈ স্থানান্তৰ কৰা হ’ব। আইচিচিৰ প্ৰেছ বিজ্ঞপ্তিত নিশ্চিত কৰা হৈছে যে, দেশত ক’ভিড-১৯ৰ দ্বিতীয় ঢৌৰ পৰিণামৰ বাবে এই পদক্ষেপ লোৱা হৈছে।
আইচিচিয়ে প্ৰতিযোগিতাখনৰ বাবে চাৰিটা স্থান ঘোষণা কৰে – ডুবাই আন্তঃৰাষ্ট্ৰীয় ষ্টেডিয়াম, আবু ধাবিৰ শ্বেখ জায়েদ ষ্টেডিয়াম, শাৰজাহ ষ্টেডিয়াম আৰু ওমান ক্ৰিকেট একাডেমী গ্ৰাউণ্ড। প্ৰতিযোগিতাখনৰ কোৱালিফায়াৰ পৰ্যায়টো ওমান আৰু ইউ.এ.ই.ৰ মাজত বিভক্ত কৰা হ’ব আৰু চাৰিটা দলে চুপাৰ ১২ৰ বাবে যোগ্যতা অৰ্জন কৰিব।
প্ৰাথমিক পৰ্যায়ত প্ৰতিদ্বন্দিতা কৰা আঠটা দল হৈছে বাংলাদেশ, শ্ৰীলংকা, আয়াৰলেণ্ড, নেডাৰলেণ্ড, স্কটলেণ্ড, নামিবিয়া, ওমান আৰু পাপুয়া নিউ গিনি, (প্লে-অফ পৰ্যায়ৰ আগতে) আৰু ফাইনেল ১৪ নৱেম্বৰত। বিচিচিআইৰ সভাপতি সৌৰভ গাংগুলীয়ে পূৰ্বে ভাৰতত প্ৰতিযোগিতাখন আয়োজন কৰিবলৈ সক্ষম নোহোৱাৰ বাবে হতাশা ব্যক্ত কৰিছিল কিন্তু নিশ্চিত কৰিছিল যে মধ্য প্ৰাচ্যত প্ৰতিযোগিতাখন কঢ়িয়াই অনাৰ বাবে বোৰ্ডে ইয়াৰ সকলো প্ৰচেষ্টা আগবঢ়াব।
