হাতে-লোটে আটক কৰি আৰক্ষীক চমজাই দিছিল ৰাইজে, তদন্তৰ বাবে নিয়াৰ সময়তে পলায়ন চুৰিৰ গোচৰত অভিযুক্ত বাক্কা।
বটদ্ৰৱাত আৰক্ষীৰ জিম্মাৰ পৰা পলায়ন কৰিলে চুৰিৰ গোচৰত অভিযুক্ত বাহাৰুল ইছলাম ঢালি ওৰফে বাক্কাই। আৰক্ষীক ঠেলা মাৰি হেণ্ডকাফ খুলি পলায়ন কৰা অভিযুক্তজনক বিচাৰি বিগত দুদিন ধৰি অভিযান অব্যাহত ৰাখিছে বটদ্ৰৱা আৰক্ষীয়ে। কিন্তু এতিয়ালৈকে অভিযুক্তজনক আটক কৰিবলৈ সক্ষম হোৱা নাই আৰক্ষী।
ৰাইজে হাতে-লোটে আটক কৰিছিল বাক্কাক। প্ৰাপ্ত তথ্য অনুসৰি, বটদ্ৰৱাৰ হাইডুবিত চুৰি কৰাৰ অভিযোগত স্থানীয় ৰাইজে হাতে-লোটে আটক কৰিছিল বাক্কাক। পৰৱৰ্তী সময়ত ৰাইজে অভিযুক্তজনক বটদ্ৰৱা আৰক্ষীক চমজাই দিয়ে। ৰাইজৰ পৰা অভিযুক্তজনক নিজৰ জিম্মাত লোৱাৰ পিছত আৰক্ষীয়ে বাক্কাক হেণ্ডকাফ লগাই তদন্তৰ বাবে লৈ গৈছিল। সেই সময়তে আৰক্ষীক ঠেলা মাৰি হেণ্ডকাফ খুলি পলায়ন কৰে অভিযুক্তজনে। ঘটনাৰ পিছতে পলাতক অভিযুক্তজনক বিচাৰি অভিযান আৰম্ভ কৰে বটদ্ৰৱা আৰক্ষীয়ে। কিন্তু দুদিন উকলি যোৱাৰ পিছতো বাক্কাৰ সন্ধান উলিয়াব পৰা নাই আৰক্ষীয়ে। অভিযোগ অনুসৰি পূৰ্বেও কেইবাবাৰো চুৰিকাণ্ড সংঘটিত কৰিছে বাক্কাই।
বটদ্ৰৱাৰ বিভিন্ন প্ৰান্তত সংঘটিত চুৰিকাণ্ডৰ সৈতে বাক্কা জড়িত থকাৰ অভিযোগ আছে। আনকি বাক্কাৰ বিৰুদ্ধে বটদ্ৰৱা আৰক্ষী থানাত পূৰ্বেও গোচৰ ৰুজু হৈ থকা বুলি জানিব পৰা গৈছে।
