বলিউদৰ বিশিষ্ট অভিনেতা অমিতাভ বচ্চনৰ ১১ অক্টোবৰত নিজৰ ৮৪ সংখ্যক জন্মদিন উদযাপনৰ প্ৰস্তুতি চলোৱাৰ সময়তে প্ৰযোজক আনন্দ পণ্ডিতে কিংবদন্তি অভিনেতাগৰাকীৰ প্ৰতি সন্মান জনোৱাৰ উদ্দেশ্যে যুৱ প্ৰজন্মৰ শিক্ষাৰ ক্ষেত্ৰত সহায় আগবঢ়োৱাৰ এক বিশেষ পদক্ষেপ ঘোষণা কৰিছে।
লোটাছ ফাউণ্ডেচনৰ সহযোগত আনন্দ পণ্ডিতে অমিতাভ বচ্চনৰ জন্মদিনৰ উপহাৰ হিচাপে ১,০০০ গৰাকী যোগ্য শিক্ষাৰ্থীক বৃত্তি প্ৰদান কৰিব। ইয়াৰ উপৰি মুম্বাইৰ বিভিন্ন স্থানত হৰ্ডিং স্থাপন কৰা হ’ব আৰু সমগ্ৰ ভাৰতৰ চিনেমা হলসমূহৰ পৰ্দাত অভিনেতাগৰাকীৰ জন্মদিনৰ শুভেচ্ছা বাৰ্তা প্ৰদৰ্শন কৰা হ’ব।
এই পদক্ষেপৰ লক্ষ্য হৈছে অমিতাভ বচ্চনৰ চিৰসেউজ অৱদানক উদযাপন কৰাৰ লগতে তেওঁৰ কৰ্মজীৱনৰ সৈতে জড়িত অধ্যৱসায়, নিষ্ঠা আৰু উৎকৰ্ষতাৰ দৰে মূল্যবোধসমূহক সন্মান জনোৱা।
অভিনেতাগৰাকীৰ প্ৰতি থকা নিজৰ শ্ৰদ্ধা প্ৰকাশ কৰি আনন্দ পণ্ডিতে কয়, ‘প্ৰতি বছৰে অমিতজীৰ প্ৰতি মোৰ অনুভৱ আৰু শ্ৰদ্ধাৰ কথা ভাষাৰে প্ৰকাশ কৰাটো মোৰ বাবে কঠিন হৈ পৰে। ব্যক্তিগত জীৱনৰ লগতে চিনেমাই মোৰ জীৱনক যিদৰে প্ৰভাৱিত কৰিছে, তাৰ বাবেও তেওঁ মোৰ বাবে অত্যন্ত গুৰুত্বপূৰ্ণ। তেওঁৰ অভিনয়ৰ বিশাল কৰ্মৰাজিয়েই কেৱল মোক অনুপ্ৰাণিত কৰা নাই, বৰঞ্চ নিজৰ কামৰ প্ৰতি তেওঁ আজিও যি মনোভাৱেৰে আগবাঢ়ি যায়, সেয়াও মোৰ বাবে প্ৰেৰণাৰ উৎস। ‘জঞ্জীৰ’ ছবিত আমি প্ৰথমবাৰৰ বাবে দেখা সেই জুই আজিও তেওঁৰ ভিতৰত একেদৰেই জ্বলি আছে। আজিও তেওঁৰ নিজৰ কামত এগৰাকী নৱাগত শিল্পীৰ দৰে উদ্যম প্ৰদৰ্শন কৰে, লগতে এগৰাকী অভিজ্ঞ মহান শিল্পীৰ গভীৰতা আৰু গাম্ভীৰ্যও বজাই ৰাখে।’
প্ৰযোজকগৰাকীৰ মতে, এই বৃত্তি প্ৰদানৰ পদক্ষেপৰ জৰিয়তে চিনেমাৰ জগতৰ বাহিৰলৈও অমিতাভ বচ্চনৰ পৰা লাভ কৰা প্ৰেৰণা বিয়পাই দিব পৰা যাব আৰু নতুন প্ৰজন্মক উৎসাহিত কৰিব পৰা যাব।
এই পদক্ষেপৰ আঁৰৰ উদ্দেশ্য ব্যাখ্যা কৰি আনন্দ পণ্ডিতে কয়, ‘অমিতজীয়ে আমাক দেখুৱাইছে যে নিষ্ঠা, প্ৰতিকূলতাৰ সন্মুখত দৃঢ়তা আৰু নিজকে বাৰে বাৰে নতুন ৰূপত গঢ়ি তোলাৰ মানসিকতাই এজন মানুহক কিমান দূৰলৈ লৈ যাব পাৰে। এই পদক্ষেপৰ জৰিয়তে মই কেৱল তেওঁ এগৰাকী কিংবদন্তি শিল্পী হিচাপে যি স্থান লাভ কৰিছে, তাকেই উদযাপন কৰিব বিচৰা নাই; বৰঞ্চ তেওঁ প্ৰতিনিধিত্ব কৰা মূল্যবোধসমূহকো সন্মান জনাব বিচাৰিছোঁ। তেওঁৰ জীৱনযাত্ৰাই যদি যুৱ প্ৰজন্মক দৃঢ় বিশ্বাসেৰে নিজৰ সপোনৰ পিছত খেদি যাবলৈ অনুপ্ৰাণিত কৰিব পাৰে, তেন্তে সেয়াই হ’ব উদযাপন কৰাৰ যোগ্য এক উত্তৰাধিকাৰ।’
অমিতাভ বচ্চনৰ জন্মদিন উপলক্ষে চিনেমাৰ জগতৰ বাহিৰতো আনন্দ পণ্ডিতে এনে পদক্ষেপ গ্ৰহণ কৰাটো এয়াই প্ৰথম নহয়। ২০২২ চনত অভিনেতাগৰাকীৰ ৮০ সংখ্যক জন্মদিন উপলক্ষে প্ৰযোজকগৰাকীয়ে ৮,০০০ শিশুক আহাৰ যোগান ধৰাৰ প্ৰতিশ্ৰুতি দিয়াৰ লগতে ৮০০টা শ্ৰৱণ-সহায়ক যন্ত্ৰ দান কৰিছিল।
ইয়াৰ পিছৰ বছৰ, অৰ্থাৎ ২০২৩ চনত, তেওঁ অমিতাভ বচ্চনৰ নামত ৮,১০০ৰো অধিক গছ উৎসৰ্গা কৰিছিল। এই পদক্ষেপৰ জৰিয়তে ‘অমিতাভ বচ্চন গ্ৰোভ’ (Amitabh Bachchan Grove) নামৰ এখন বৃক্ষবাগিচা গঢ়ি তোলা হৈছিল।
এইবাৰ বৃত্তি প্ৰদানৰ কাৰ্যসূচীৰ জৰিয়তে আনন্দ পণ্ডিতে পুনৰ এবাৰ অমিতাভ বচ্চনৰ জন্মদিনক বিশেষ ৰূপত উদযাপন কৰিবলৈ আগবাঢ়িছে। এই পদক্ষেপত শিক্ষা আৰু সমাজৰ প্ৰতি অৱদানক জন্মদিনৰ উদযাপনৰ কেন্দ্ৰবিন্দু হিচাপে স্থান দিয়া হৈছে।
