প্ৰায় চাৰি মাহৰ বিৰতিৰ অন্তত চলিত মাহৰ প্ৰথম সপ্তাহতে পৰ্যটকৰ বাবে মুকলি হ’ব বিশ্ব ঐতিহ্যক্ষেত্ৰ কাজিৰঙা ৰাষ্ট্ৰীয় উদ্যান আৰু ব্যাঘ্ৰ সংৰক্ষণ ক্ষেত্ৰ। বন বিভাগৰ জাননী অনুসৰি, ৩ অক্টোবৰৰ পৰা ২০২৬-২৭ পৰ্যটন বৰ্ষৰ বাবে জীপ ছাফাৰী আৰম্ভ হ’ব।
পুৱা ৭:৩০ বজাৰ পৰা ১০ বজালৈ আৰু বিয়লি ১:৩০ বজাৰ পৰা ৩ বজালৈ থাকিব জীপ ছাফাৰীৰ প্ৰৱেশৰ সময়।
নতুন পৰ্যটন বৰ্ষক লৈ ইতিমধ্যে সাজু হৈ উঠিছে কাজিৰঙাৰ পৰ্যটন উদ্যোগ। পৰ্যটকক নতুন ৰূপত আদৰিবলৈ প্ৰস্তুতি সম্পূৰ্ণ কৰিছে কাজিৰঙা জীপ ছাফাৰী আৰু পৰ্যটন ব্যৱসায় কল্যাণ সমিতিয়েও। আগতীয়াকৈ বুকিং লাভ কৰাৰ কথাও জানিবলৈ দিছে পৰ্যটন উদ্যোগীসকলে।
কাজিৰঙা পৰ্যটনৰ সৈতে ওতপ্ৰোতভাৱে জড়িত কাজিৰঙা হোটেল এছ’চিয়েচনো নতুন পৰ্যটন বৰ্ষৰ বাবে সাজু হৈছে। এছ’চিয়েচনৰ অধীনত থকা ৮১খন অতিথিশালা ৰং কৰি আটকধুনীয়াকৈ সজাই-পৰাই তোলা হৈছে। পৰ্যটকক উন্নত সেৱা আৰু অতিথি আপ্যায়ন আগবঢ়াবলৈ সম্পূৰ্ণৰূপে সাজু হৈছে হোটেল-ৰিজ’ৰ্টসমূহ।
উল্লেখ্য যে, ২০২৫-২৬ বৰ্ষত কাজিৰঙা ৰাষ্ট্ৰীয় উদ্যান আৰু ব্যাঘ্ৰ সংৰক্ষণ ক্ষেত্ৰলৈ মুঠ ৪,৬৮,১৪৭গৰাকী পৰ্যটকৰ আগমন ঘটিছিল। ইয়াৰে ৩০,৪৭৪গৰাকী আছিল বিদেশী পৰ্যটক। মুঠ পৰ্যটকৰ সংখ্যাই পূৰ্বৰ বৰ্ষৰ তুলনাত প্ৰায় ১৫ শতাংশ বৃদ্ধি লাভ কৰিছিল। মুঠ সংখ্যাৰ হিচাপত বিদেশী পৰ্যটকৰ অংশ প্ৰায় ৬.৫ শতাংশ।
এইবাৰো কাজিৰঙালৈ দেশ-বিদেশৰ পৰ্যটকৰ আগমন বৃদ্ধি পাব বুলি আশাবাদী পৰ্যটন উদ্যোগীসকল। হোটেল, জীপ ছাফাৰী আৰু আন আন পৰ্যটন ব্যৱসায়ৰ সৈতে জড়িতসকলৰ আশা—২০২৬-২৭ পৰ্যটন বৰ্ষটো কাজিৰঙাৰ পৰ্যটন খণ্ডৰ বাবে ইতিবাচক আৰু সফল হওক।
