কানাডাৰ ব্ৰিটিছ কলম্বিয়াৰ Williston Reservoir-ত হঠাৎ দেখা পোৱা গছ-গছনিৰে ভৰা এটা বৃহৎ দ্বীপে সৃষ্টি কৰিছে ব্যাপক কৌতূহল। জুলাই মাহত প্ৰথমবাৰৰ বাবে দেখা পোৱা দ্বীপটো আগষ্টৰ মাজভাগত হঠাৎ নোহোৱা হৈ যায়। পিছত উপগ্ৰহৰ ছবিৰ সহায়ত মূল স্থানৰ পৰা প্ৰায় ৩০ কিলোমিটাৰ দূৰত পুনৰ সন্ধান পোৱা যায় দ্বীপটোৰ।
ব্ৰিটিছ কলম্বিয়াৰ অন্যতম বৃহৎ জলাধাৰ Williston Reservoir-ত জুলাইৰ শেষৰ ফালে স্থানীয় নাঁও চালকসকলে পানীৰ ওপৰত এটা বৃহৎ গছ-গছনিৰে ভৰা অংশ ওপঙি থকা দেখা পায়। প্ৰায় ১৪০ মিটাৰ দীঘল আৰু ৭০ মিটাৰ বহল এই দ্বীপটোৰ আয়তন প্ৰায় ৯,৮০০ বৰ্গমিটাৰ, অৰ্থাৎ প্ৰায় দুখন ফুটবল খেলপথাৰৰ সমান।
দ্বীপটোত পৰিপক্ব গছ-গছনিৰ লগতে চৰাই আৰু আন সৰু জীৱ-জন্তুৰ উপস্থিতিও লক্ষ্য কৰা হয়। কিন্তু আশ্চৰ্যজনকভাৱে, ই কোনো মানচিত্ৰত নাছিল।
স্থানীয় লোকসকলে দ্বীপটোৰ ছবি আৰু ভিডিঅ’ সামাজিক মাধ্যমত প্ৰকাশ কৰাৰ পিছত ব্যাপকভাৱে ভাইৰেল হৈ পৰে। প্ৰথম অৱস্থাত B.C. Hydro-ৰ বিষয়াসকলেও এই ছবি আৰু ভিডিঅ’ক লৈ সন্দেহ প্ৰকাশ আছিল। কৃত্ৰিম বুদ্ধিমত্তা বা AI ব্যৱহাৰ কৰি ছবি তৈয়াৰ কৰা হ’ব পাৰে বুলিও সন্দেহ কৰা হৈছিল। অৱশেষত উপগ্ৰহৰ ছবিৰ জৰিয়তে দ্বীপটো প্ৰকৃত বুলি নিশ্চিত কৰা হয়।
হঠাৎ নোহোৱা হ’ল দ্বীপটো
দ্বীপটোৰ অৱস্থান প্ৰথমে Williston Reservoir-ৰ Finlay Bay অঞ্চলৰ ওচৰত ধৰা পৰিছিল। ২১ জুলাইৰ উপগ্ৰহৰ ছবিতো ইয়াৰ উপস্থিতি নিশ্চিত কৰা হৈছিল।
কিন্তু আগষ্টৰ মাজভাগত দ্বীপটো সেই স্থানৰ পৰা নোহোৱা হৈ যায়। ইয়াৰ পিছত B.C. Hydro-এ উপগ্ৰহৰ ছবি, সৰু বিমানৰ পৰা লাভ কৰা তথ্য আৰু স্থানীয় নাওচালকৰ পৰ্যবেক্ষণৰ সহায়ত দ্বীপটোৰ সন্ধান আৰম্ভ কৰে।
অৱশেষত ৩১ আগষ্টত B.C. Hydro-এ নিশ্চিত কৰে যে দ্বীপটো হেৰাই যোৱা নাই। ই মূল স্থানৰ পৰা প্ৰায় ৩০ কিলোমিটাৰ উত্তৰ-পশ্চিমে Ospika Arm অঞ্চলৰ পাৰৰ কাষত ওপঙি থকা অৱস্থাত আছে।
উপলব্ধ তথ্য অনুসৰি, মাত্ৰ প্ৰায় ১৫ দিনত দ্বীপটোৱে ৩০ কিলোমিটাৰ দূৰত্ব অতিক্ৰম কৰিছে। B.C. Hydro-ৰ মতে, বৰ্তমান দ্বীপটো অক্ষত অৱস্থাতে আছে।
কেনেকৈ সৃষ্টি হ’ল এই দ্বীপটো?
দ্বীপটোৰ প্ৰকৃত উৎপত্তি এতিয়াও সম্পূৰ্ণৰূপে নিশ্চিত হোৱা নাই। অৱশ্যে B.C. Hydro-ৰ মতে, বহু বছৰ ধৰি জলাধাৰৰ পাৰৰ কাষত জমা হোৱা কাঠ, গছৰ অৱশিষ্ট আৰু অন্যান্য জৈৱিক পদাৰ্থৰ পৰা এই গঠনটো সৃষ্টি হ’ব পাৰে।
সময়ৰ লগে লগে সেই কাঠ আৰু জৈৱিক পদাৰ্থৰ ওপৰত গছ-গছনি গজি উঠি এটা ক্ষুদ্ৰ পৰিৱেশতন্ত্ৰ গঢ় লৈ উঠাৰ সম্ভাৱনা আছে।
এইবাৰ Williston Reservoir-ৰ পানীৰ স্তৰ বিগত ১৪ বছৰৰ ভিতৰত সৰ্বোচ্চ পৰ্যায়ত উপনীত হোৱাও এই ঘটনাৰ অন্যতম কাৰণ বুলি ধাৰণা কৰা হৈছে। পানীৰ স্তৰ বৃদ্ধি পোৱাৰ ফলত পাৰৰ সৈতে সংলগ্ন হৈ থকা এই বৃহৎ গঠনটো বিচ্ছিন্ন হৈ জলপৃষ্ঠত ওপঙি আহিব পাৰে বুলি বিশেষজ্ঞসকলে মত প্ৰকাশ কৰিছে।
বিশ্বৰ আন স্থানতো দেখা গৈছে এনে পৰিঘটনা
পানীৰ ওপৰত গছ-গছনিৰে ভৰা এনে ওপঙি থকা দ্বীপ একেবাৰে নতুন পৰিঘটনা নহয়। বিশ্বৰ বিভিন্ন হ্ৰদ আৰু জলাশয়ত ইয়াৰ উদাহৰণ পোৱা যায়।
আমেৰিকাৰ Wisconsin ৰাজ্যৰ Lake Chippewa-তো ‘Forty Acre Bog’ নামৰ এটা উল্লেখযোগ্য ওপঙি থকা দ্বীপ আছে। বিশেষজ্ঞসকলৰ মতে, অতীতত এনে পৰিঘটনা অধিক সাধাৰণ আছিল।
বনধ্বংস আৰু নদীত বান্ধ নিৰ্মাণৰ ফলত কাঠ আৰু গছৰ অৱশিষ্টৰ স্বাভাৱিক প্ৰবাহ বাধাগ্ৰস্ত হোৱাৰ বাবে বৰ্তমান এনে দৃশ্য তুলনামূলকভাৱে কম দেখা যায়।
এতিয়াও ৰৈ গৈছে বহু প্ৰশ্ন
দ্বীপটোৰ সন্ধান পোৱাৰ পিছত এটা ৰহস্যৰ সমাধান হ’ল যদিও, ইয়াৰ প্ৰকৃত উৎপত্তি আৰু ই কেনেকৈ ইমান দূৰলৈ ওপঙি গ’ল সেই প্ৰশ্নৰ সম্পূৰ্ণ উত্তৰ এতিয়াও পোৱা নাই।
B.C. Hydro-এ দ্বীপটোৰ ওপৰত নজৰ ৰাখি ইয়াৰ গঠন, গতিবিধি আৰু উৎস সম্পৰ্কে অধিক তথ্য সংগ্ৰহ কৰি আছে।
Williston Reservoir-ৰ এই অস্বাভাৱিক দৃশ্যই এতিয়া বিজ্ঞানী, স্থানীয় বাসিন্দা আৰু প্ৰকৃতিপ্ৰেমীৰ দৃষ্টি আকৰ্ষণ কৰিছে। পানীৰ ওপৰত এখন সৰু বনাঞ্চলৰ দৰে ওপঙি থকা এই দ্বীপটো প্ৰকৃতিৰ এক বিৰল আৰু আকৰ্ষণীয় পৰিঘটনা হিচাপে পৰিগণিত হৈছে।
