তিব্বতৰ পৰা অহা পানীৰ ধলত নেপালত ভয়ংকৰ বান, ভুটে কোশী নদীত ৭ জনৰ মৃত্যু
নেপালৰ পাহাৰীয়া সীমামূৰীয়া ৰাছুৱা জিলাত বুধবাৰে পুৱা ভোটেকোশী নদীত আকস্মিকভাৱে অহা প্ৰচণ্ড বানত ব্যাপক ধ্বংসলীলা সংঘটিত হৈছে। এতিয়ালৈকে ৭জন লোকৰ মৃত্যু নিশ্চিত হোৱাৰ বিপৰীতে কমেও ২৫জনক উদ্ধাৰ কৰা হৈছে। উদ্ধাৰ অভিযান অব্যাহত থকাৰ মাজতে কেইবাজনো লোক সন্ধানহীন হৈ আছে।
কেনেকৈ আহিল বান?
প্ৰাথমিক তথ্য অনুসৰি, বানৰ মূল পানীৰ ধল তিব্বতৰ ফালৰ পৰা ভোটেকোশী নদীৰ ওপৰৰ জলাধাৰ অঞ্চললৈ আহিছিল। স্থানীয় সময় অনুসৰি পুৱা প্ৰায় ৯ বজাত নদীৰ জলস্তৰ হঠাৎ বৃদ্ধি পায় আৰু অতি কম সময়ৰ ভিতৰতে প্ৰচণ্ড সোঁতত পৰিণত হয়।
নেপালৰ ৰাছুৱা জিলাত সেই সময়ত হোৱা বৰষুণক এই বানৰ প্ৰধান কাৰণ বুলি এতিয়ালৈকে নিশ্চিত কৰা হোৱা নাই। বতৰ বিজ্ঞানীসকলে উপগ্ৰহীয় তথ্যত তিব্বতৰ ফালে প্ৰচণ্ড বৰষুণৰ উপস্থিতি লক্ষ্য কৰিছে। একে সময়তে, হিমবাহ-সংলগ্ন হ্ৰদৰ পানী হঠাতে ওলাই অহা Glacial Lake Outburst Flood (GLOF) বা ওপৰৰ অঞ্চলত ভূমিস্খলনে নদী বন্ধ কৰি পিছত সেই পানী আকস্মিকভাৱে ওলাই অহাৰ সম্ভাৱনাও পৰীক্ষা কৰা হৈছে। সঠিক কাৰণৰ তদন্ত অব্যাহত আছে।
মুহূৰ্ততে বিধ্বস্ত ৰাছুৱা
ভয়ংকৰ পানীৰ সোঁতে টিমুৰে, ছ্যাপু বেছি আৰু সীমান্তৱৰ্তী অঞ্চলৰ ঘৰ-দুৱাৰ, বজাৰ, পথ, আৰক্ষী চকী আৰু অন্যান্য আন্তঃগাঁথনি উটুৱাই নিয়ে। টিমুৰত কৰ্তব্যৰত ৯জন সশস্ত্ৰ আৰক্ষী বাহিনীৰ জোৱান সন্ধানহীন বুলি জানিব পৰা গৈছে।
বানৰ ফলত জলবিদ্যুৎ প্ৰকল্প, বিদ্যুৎ সংযোগ ব্যৱস্থা আৰু পথ-দলঙতো ব্যাপক ক্ষতি হৈছে। প্ৰায় ৪৩০ মেগাৱাট বিদ্যুৎ উৎপাদন ক্ষমতা প্ৰভাৱিত হোৱা বুলি ৰয়টাৰ্ছৰ প্ৰতিবেদনত উল্লেখ কৰা হৈছে।
উদ্ধাৰ অভিযান তীব্ৰতৰ
নেপাল সেনা, সশস্ত্ৰ আৰক্ষী আৰু নেপাল আৰক্ষীয়ে হেলিকপ্টাৰসহ ব্যাপক উদ্ধাৰ অভিযান চলাইছে। ইফালে ভোটেকোশী পানী নেপাল আৰু তিব্বতৰ মাজত অৱস্থিত এখন প্ৰধান তথা ঐতিহাসিক নদী ত্ৰিশূলী নদীলৈ নামি যোৱাৰ বাবে নুৱাকোট, ধাদিং, গোৰ্খা আৰু চিতৱান জিলাৰ নদীপাৰৰ অঞ্চলসমূহত সতৰ্কতা জাৰি কৰা হৈছে। নদীৰ কাষৰ লোকসকলক নিৰাপদ আৰু উচ্চ স্থানলৈ স্থানান্তৰিত হ’বলৈ আহ্বান জনোৱা হৈছে।
বানৰ সঠিক উৎস আৰু সম্পূৰ্ণ ক্ষয়-ক্ষতিৰ তথ্য উদ্ধাৰ অভিযান আৰু তদন্ত আগবঢ়াৰ লগে লগে আৰু অধিক স্পষ্ট হ’ব।
