উদ্বোধনী বৰ্ষৰ ইম্পেৰিয়েল ব্লু পেকেজড ড্ৰিংকিং ৱাটাৰ অসম প্ৰিমিয়াৰ লীগৰ চেম্পিয়ন দলে ৫০ লাখ টকা তথা ৰানাৰ্ছআপ দলটোৱে ২৫ লাখ টকা লাভ কৰিব৷ উল্লেখ্য যে অসম ক্ৰিকেট সন্থাৰ তত্বাৱধানত ‘আমাৰ অসম, আমাৰ গৌৰব’ মূলমন্ত্ৰৰে আয়োজন কৰা উদ্বোধনী বৰ্ষৰ এ পি এলৰ ছেমিফাইনেল খেলিব লগা চাৰিওটা দল ইতিমধ্যে নিশ্চিত হৈছে৷
সেই অনুসৰি পইণ্ট তালিকাৰ শীৰ্ষ চাৰিটা দল ক্ৰমে গুৱাহাটী ৰয়েলছ, ডিব্ৰুগড় ৱাৰিয়ৰ্ছ, বৰপেটা ব্ৰেভছ আৰু বৰাক লিজেণ্ডছে অহা ২১ আগষ্টত হ’বলগা ছেমিফাইনেল মেচ দুখনত প্ৰতিদ্বন্দ্বিতা কৰিব৷
আনহাতে, অহা ২৩ আগষ্টত এ চি এ ষ্টেডিয়ামত অনুষ্ঠিত হ’ব ফাইনেল৷ ৰাজ্যৰ প্ৰতিভা বিকাশৰ লক্ষ্যৰে অসম ক্ৰিকেট সন্থাই আয়োজন কৰা প্ৰথম বৰ্ষৰ এ পি এলত আঠটা দলে ২৩ দিনত মুঠ ৪৩ খন মেচত অংশ লয়৷
