গলত অনুষ্ঠিত ভাৰত আৰু শ্ৰীলংকাৰ মাজৰ প্ৰথমখন টেষ্টত জয় সাব্যস্ত কৰিছে ভাৰতে। পঞ্চম দিনা শ্ৰীলংকাক দ্বিতীয় ইনিংছত ২০৬ ৰানত অল আউট কৰি ভাৰতে ১৬৫ ৰানত মেচখন জিকিবলৈ সক্ষম হয়। এই জয়ৰ লগে লগে টেষ্টৰ শৃংখলাত ভাৰতে ১-০ ব্যৱধানত অগ্ৰগতি লাভ কৰিছে।
প্ৰথম ইনিংছত ভাৰতে ৪৬২ ৰান সংগ্ৰহ কৰিছিল। দলটোৰ হৈ দেৱদত পাডিক্কালে দুৰ্দান্ত বেটিং কৰি ১৬৭ ৰানৰ বিশাল ইনিংছ খেলে। কে এল ৰাহুলেও ৮২ ৰান কৰি ভাৰতৰ বৃহৎ স্ক’ৰ গঢ়াত গুৰুত্বপূৰ্ণ অৱদান আগবঢ়ায়। ইয়াৰ প্ৰত্যুত্তৰত শ্ৰীলংকাৰ প্ৰথম ইনিংছ ২৮৪ ৰানতে সামৰণি পৰে।
দ্বিতীয় ইনিংছত ভাৰতে ১৯৩ ৰান সংগ্ৰহ কৰি শ্ৰীলংকাৰ সন্মুখত ৩৭২ ৰানৰ বিজয় লক্ষ্য নিৰ্ধাৰণ কৰে। লক্ষ্য অনুসৰণ কৰিবলৈ নামি শ্ৰীলংকাই আৰম্ভণিতে প্ৰতিৰোধ গঢ়িলেও ভাৰতীয় বলাৰসকলৰ সন্মুখত শেষ পৰ্যন্ত তিষ্ঠিব নোৱাৰিলে। পঞ্চম দিনা শ্ৰীলংকাৰ ইনিংছ ২০৬ ৰানতে শেষ হয়।
ভাৰতৰ জয়ৰ অন্যতম নায়ক হৈ পৰে বাঁওহতীয়া স্পিনাৰ মানৱ সুথাৰ। মাত্ৰ দ্বিতীয়খন টেষ্ট খেলিয়েই সুথাৰে মেচখনত মুঠ ১০টা উইকেট দখল কৰে। দ্বিতীয় ইনিংছত তেওঁ ৫৫ ৰান ব্যয় কৰি ৬টা উইকেট দখল কৰি শ্ৰীলংকাৰ বেটিং লাইনআপত মোক্ষম আঘাত হানে। এই প্ৰদৰ্শনৰ জৰিয়তে বিদেশৰ মাটিত ১০ উইকেট দখল কৰা ভাৰতৰ কনিষ্ঠ স্পিনাৰ হিচাপে সুথাৰে বিশেষ কৃতিত্ব অৰ্জন কৰে।
দেৱদত্ত পাডিক্কালক মেচখনৰ শ্ৰেষ্ঠ খেলুৱৈ হিচাপে নিৰ্বাচিত কৰা হয়। গল টেষ্টত জয়লাভে ভাৰতৰ বিশ্ব টেষ্ট চেম্পিয়নশ্বিপ অভিযানতো গুৰুত্বপূৰ্ণ পইণ্ট যোগ কৰিছে। এই জয়ৰ পিছত ভাৰতৰ WTC পইণ্ট শতাংশ ৫৩.৩৩লৈ বৃদ্ধি পাইছে।
এতিয়া শৃংখলাৰ দ্বিতীয়খন তথা অন্তিম টেষ্ট অহা ২৩ আগষ্টৰ পৰা কলম্বোৰ ছিংহলিজ স্প’ৰ্টছ ক্লাবত অনুষ্ঠিত হ’ব। প্ৰথমখন টেষ্টৰ সফলতা অব্যাহত ৰাখি ভাৰতে শৃংখলা ২-০ ব্যৱধানত দখল কৰাৰ লক্ষ্যৰে খেলপথাৰত নামিব।
