মাৰ্কিন ৰাষ্ট্ৰপতি ড’নাল্ড ট্ৰাম্পে নিজৰ ছ’চিয়েল মিডিয়া প্লেটফৰ্ম ‘ট্ৰুথ ছ’চিয়েল’ত (Truth Social) “TRUMP 2028” লিখা এটা টুপী পৰিধান কৰা এখন ফটো শ্বেয়াৰ কৰি পুনৰ তৃতীয়বাৰৰ বাবে ৰাষ্ট্ৰপতি পদত প্ৰতিদ্বন্দ্বিতা কৰাৰ চৰ্চা তীব্ৰতৰ কৰি তুলিছে। ক’লা-বগা ফটোখনৰ সৈতে তেওঁ “আমি জয়ী হ’ম” (We are going to win) বুলিও এটা কেপচন সংলগ্ন কৰে। যদিও এয়া কোনো আনুষ্ঠানিক নিৰ্বাচনী ঘোষণা নহয়, তথাপি এই প’ষ্টটোৱে ৰাজনৈতিক মহল আৰু তেওঁৰ সমৰ্থকসকলৰ মাজত ব্যাপক কৌতূহলৰ সৃষ্টি কৰিছে।
উল্লেখ্য যে ইয়াৰ কিছুদিন পূৰ্বে মেৰিলেণ্ডৰ জয়েন্ট বেচ এণ্ড্ৰিউজত সাংবাদিকৰ আগত ট্ৰাম্পে স্বীকাৰ কৰিছিল যে বৰ্তমানৰ সাংবিধানিক নিয়ম অনুসৰি তেওঁ পুনৰ নিৰ্বাচনত অৱতীৰ্ণ হোৱাৰ সুযোগ সীমিত। তেওঁ পুনৰ প্ৰতিদ্বন্দ্বিতা কৰিবলৈ আগ্ৰহী যদিও এই ক্ষেত্ৰত দেশখনৰ আইন অত্যন্ত শক্তিশালী আৰু কঠোৰ বুলি মন্তব্য কৰিছিল।
আমেৰিকাৰ সংবিধানৰ ২২তম সংশোধনী অনুসৰি কোনো ব্যক্তিয়ে দুবাৰতকৈ অধিক সময়ৰ বাবে ৰাষ্ট্ৰপতি হিচাপে নিৰ্বাচিত হ’ব নোৱাৰে। ফ্ৰেংকলিন ডি ৰুজভেল্ট একেৰাহে চাৰিবাৰ ৰাষ্ট্ৰপতি নিৰ্বাচিত হোৱাৰ পাছত ১৯৫১ চনত এই সংশোধনী গৃহীত কৰা হৈছিল। ২০১৬ আৰু ২০২৪ চনৰ ৰাষ্ট্ৰপতি নিৰ্বাচনত জয়লাভ কৰি ট্ৰাম্পে ইতিমধ্যে দুটা কাৰ্যকালৰ সৰ্বোচ্চ সীমা স্পৰ্শ কৰিছে। ফলত কোনো সাংবিধানিক সংশোধন নোহোৱালৈকে ২০২৮ চনৰ ৰাষ্ট্ৰপতি নিৰ্বাচনত তেওঁৰ পুনৰ প্ৰতিদ্বন্দ্বিতা কৰাটো বৰ্তমানৰ মাৰ্কিন আইন অনুসৰি সম্পূৰ্ণ নিষিদ্ধ।
