পূৰ্বৰ ভাৰতীয় তাৰকা বেটাৰ ভিভিএছ লক্ষ্মণ হ’ব নেকি ভাৰতীয় ক্ৰিকেট দলৰ নতুন মুখ্য নিৰ্বাচক? এই প্ৰশ্নক লৈ এতিয়া দেশৰ ক্ৰিকেট মহলত তীব্ৰ চৰ্চা আৰম্ভ হৈছে। যদিও এতিয়ালৈকে BCCI-এ কোনো আনুষ্ঠানিক ঘোষণা কৰা নাই, বিভিন্ন সংবাদমাধ্যমৰ প্ৰতিবেদন অনুসৰি মুখ্য নিৰ্বাচক অজিত আগাৰকাৰৰ ভৱিষ্যৎ অনিশ্চিত হৈ পৰিছে আৰু তেওঁৰ সম্ভাব্য উত্তৰাধিকাৰী হিচাপে আগবাঢ়ি আছে ভিভিএছ লক্ষ্মণৰ নাম।
বৰ্তমানৰ প্ৰতিবেদন অনুসৰি, শেহতীয়া ইংলেণ্ড ভ্ৰমণ, দল নিৰ্বাচনক লৈ সৃষ্টি হোৱা বিতৰ্ক আৰু বিশেষকৈ ৰোহিত শৰ্মাক কেন্দ্ৰ কৰি হোৱা ঘটনা প্ৰবাহৰ পিছত BCCI-এ সমগ্ৰ পৰিস্থিতিৰ পুনৰ মূল্যায়ন কৰিবলৈ সাজু হৈছে। এই পৰ্যালোচনাৰ সময়তেই মুখ্য নিৰ্বাচকৰ পদটোত পৰিৱৰ্তনৰ বিষয়েও আলোচনা হ’ব পাৰে বুলি খবৰ ওলাইছে। অৱশ্যে এতিয়াও এই সন্দৰ্ভত BCCI-ৰ পৰা কোনো আনুষ্ঠানিক নিশ্চিতকৰণ অহা নাই।
অজিত আগাৰকাৰৰ কাৰ্যকাল সম্প্ৰসাৰণ হ’ব নে নতুন মুখ আহিব, সেই সিদ্ধান্ত আগন্তুক BCCI-ৰ বৈঠকত লোৱা হ’ব পাৰে বুলি বিভিন্ন প্ৰতিবেদনত উল্লেখ কৰা হৈছে। আনহাতে, বেংগালুৰুস্থিত BCCI Centre of Excellence-ৰ মুৰব্বী হিচাপে কাম কৰি অহা ভিভিএছ লক্ষ্মণক এজন অভিজ্ঞ প্ৰশাসক হিচাপে গণ্য কৰা হয়। যুৱ ক্ৰিকেটাৰ গঢ়ি তোলাৰ ক্ষেত্ৰত তেওঁৰ অৱদানকো BCCI-এ ইতিবাচকভাৱে মূল্যায়ন কৰি আহিছে।
যদি সঁচাকৈয়ে লক্ষ্মণে মুখ্য নিৰ্বাচকৰ দায়িত্ব লাভ কৰে, তেন্তে ২০২৭ ODI বিশ্বকাপক লক্ষ্য কৰি ভাৰতীয় দল গঢ়াৰ ক্ষেত্ৰত তেওঁৰ ভূমিকা অত্যন্ত গুৰুত্বপূৰ্ণ হ’ব। আগন্তুক দিনত কোন খেলুৱৈক দীৰ্ঘম্যাদী পৰিকল্পনাত স্থান দিয়া হ’ব, কোনে ভাৰতীয় দলৰ ভৱিষ্যৎ নিৰ্মাণ কৰিব সেই সকলো সিদ্ধান্তত মুখ্য ভূমিকা ল’ব লাগিব নতুন নিৰ্বাচক মণ্ডলীয়ে।
BCCI-ৰ আনুষ্ঠানিক ঘোষণা নোহোৱালৈকে অজিত আগাৰকাৰেই ভাৰতীয় পুৰুষ ক্ৰিকেট দলৰ মুখ্য নিৰ্বাচক হিচাপে দায়িত্বত আছে। কিন্তু ক্ৰিকেট মহলৰ দৃষ্টি এতিয়া এটা প্ৰশ্নতেই, আগাৰকাৰৰ অধ্যায় শেষ? আৰম্ভ হ’ব নেকি ভিভিএছ লক্ষ্মণৰ যুগ?
