কটন বিশ্ববিদ্যালয়ত অৱস্থিত বেডমিণ্টন খেলৰ সুবিধাৰ ব্যৱহাৰৰ উদ্দেশ্যে কটন বিশ্ববিদ্যালয় আৰু অসম ক্ৰীড়া প্ৰাধিকৰণৰ অধীনস্থ ক্ৰীড়া আৰু যুৱ কল্যাণ বিভাগৰ মাজত এখন বুজাবুজি চুক্তি (MoU) স্বাক্ষৰিত হয়। চুক্তিখনত কটন বিশ্ববিদ্যালয়ৰ পঞ্জীয়ক ড০ হীৰেন ডেকা আৰু অসম ক্ৰীড়া প্ৰাধিকৰণৰ সচিব অংকুৰ ভৰালীয়ে আনুষ্ঠানিকভাৱে স্বাক্ষৰ কৰে।
এই সহযোগিতাই নিয়মিত বেডমিণ্টন প্ৰশিক্ষণ, খেলুৱৈ বিকাশ আৰু শিক্ষাৰ্থীসকলৰ লগতে ৰাজ্যজুৰি উদীয়মান যুৱ খেলুৱৈসকলৰ বাবে উন্নত ক্ৰীড়া সুযোগ সৃষ্টিৰ ক্ষেত্ৰত এক গুৰুত্বপূৰ্ণ পদক্ষেপ হিচাপে বিবেচিত হৈছে।
কৰ্তৃপক্ষই জনোৱা মতে, এই পদক্ষেপে দুয়োটা প্ৰতিষ্ঠানৰ সুলভ আৰু গুণগত ক্ৰীড়া আন্তঃগাঁথনি শক্তিশালী কৰাৰ লগতে অসমৰ যুৱসমাজৰ বাবে এক সজীৱ ক্ৰীড়া পৰিৱেশ গঢ়ি তোলাৰ ক্ষেত্ৰত উমৈহতীয়া প্ৰতিশ্ৰুতিৰ প্ৰতিফলন ঘটাইছে।
এই অংশীদাৰিত্বই অধিক সংখ্যক যুৱক-যুৱতীক ক্ৰীড়াৰ সৈতে জড়িত হ’বলৈ উৎসাহিত কৰাৰ লগতে উন্নত সুবিধা আৰু প্ৰতিষ্ঠানগত সহযোগিতাৰ জৰিয়তে উদীয়মান প্ৰতিভা বিকাশত সহায়ক হ’ব বুলি আশা প্ৰকাশ কৰা হৈছে।
