উত্তৰাখণ্ডৰ ডেৰাডুনত ঘোচ ল’বলৈ গৈ ধৰা পৰিল এজন চৰকাৰী কৰ্মচাৰী। তদুপৰি, ঊৰ্ধ্বতন বিষয়াসকলক আহি থকা দেখি ঘোচৰ টকা চোবাই গিলি পেলালে তেওঁ! তথাপি, তেওঁ ৰক্ষা পৰা নাছিল। অভিযুক্তক গ্ৰেপ্তাৰ কৰা হৈছে।
ডেৰাডুনৰ কলছি অঞ্চলত পাটোৱাৰী হিচাপে কৰ্মৰত আছিল অভিযুক্ত। তেওঁৰ নাম গুলাম হায়দৰ। ঘোচ লওঁতে তেওঁক হাতে-লোটে ধৰিছিল ৰাজ্যৰ ভিজিলেন্সৰ বিষয়াসকলে। তেওঁক ধৰিবলৈ পূৰ্বৰ পৰা ফান্দ পাতি ৰখা হৈছিল। অভিযোগ অনুসৰি, ধৰা পৰাৰ পিছত প্ৰমাণ নষ্ট কৰাৰ চেষ্টাত তেওঁ চাৰিখন ৫০০ টকীয়া নোট চোবাই চোবাই গিলি পেলাইছিল। পিছত তেওঁক গ্ৰেপ্তাৰ কৰা হয়।
জানিব পৰা মতে, স্থানীয় এজন ব্যক্তিক ঘোচ বিচাৰিছিল হায়দৰে। সেই বিষয়ে সংশ্লিষ্ট বিভাগৰ দৃষ্টি আকৰ্ষণ কৰা হৈছিল। অভিযোগ অনুসৰি, বাসস্থানৰ দুখন চৰকাৰী প্ৰমাণপত্ৰ তৈয়াৰ কৰি দিয়াৰ বাবে গুলাম হায়দৰে দুই হাজাৰ টকা ঘোচ বিচাৰিছিল। তাৰ পিছতেই ফান্দ পাতি তেওঁক ধৰা হয়। অভিযোগকাৰীক নিৰ্দিষ্ট সময়ত নিৰ্দিষ্ট পৰিমাণৰ টকা লৈ গুলামৰ ওচৰলৈ যাবলৈ কোৱা হৈছিল। তাত ভিজিলেন্সৰ বিষয়াসকলে আগতীয়াকৈ অপেক্ষা কৰি আছিল। চাৰিখন ৫০০ টকীয়া নোট হাতত লোৱাৰ লগে লগে তেওঁক ধৰি লোৱা হয়। প্ৰত্যক্ষদৰ্শীসকলে জনোৱা মতে, ধৰা পৰাৰ পিছত তেওঁ সম্পূৰ্ণ টকাখিনি মুখত ভৰাই চোবাই গিলি পেলাইছিল। ঘোচ গ্ৰহণ, প্ৰমাণ নষ্ট কৰাৰ লগতে একাধিক অভিযোগৰ ভিত্তিত তেওঁক গ্ৰেপ্তাৰ কৰা হৈছে।
