সোণাপুৰৰ কচুতলিত পুনৰ গঢ়ি উঠিছে তম্বু, অস্থায়ী ঘৰ। বসবাস আৰম্ভ কৰিছে উচ্ছেদিত একাংশ লোকে। চৰকাৰ-প্ৰশাসনৰ সকীয়নি, মুখ্যমন্ত্ৰীৰ মৰমৰ ধমক, একোকে কেৰেপ নকৰে কচুতলিত পুনৰ বসতি আৰম্ভ কৰা একাংশ লোকে।
কচুতলিলৈ ঘূৰি আহিছে উচ্ছেদিত একাংশ লোক। কচুতলিৰ মছজিদৰ সমীপৰ অঞ্চলত তম্বু বা অস্থায়ী ঘৰ সাজি পুনৰ একাংশ লোকে বেদখল আৰম্ভ কৰাত উদ্বিগ্ন হৈ উঠিছে সোণাপুৰৰ স্থানীয় লোক তথা একাংশ দল-সংগঠন। ১৪ মে’ত কচুতলিৰ বেদখলমুক্ত ভূমি পৰিদৰ্শন কৰিছিল মুখ্যমন্ত্ৰী হিমন্ত বিশ্ব শৰ্মাই। বেদখলমুক্ত কচুতলিত অসম চৰকাৰে কেইবাটাও প্ৰকল্পৰ প্ৰস্তাৱগ্ৰহণ কৰিছে। ইয়াৰ ভিতৰত অন্যতম দশম আৰক্ষী বাহিনীৰ কাৰ্যালয় স্থাপন। তদুপৰি আন কেইবাটাও প্ৰকল্প প্ৰস্তাৱ কৰিছে চৰকাৰে। এই প্ৰকল্পসমূহৰ কাম শীঘ্ৰে আৰম্ভ কৰাৰ বাবে আহ্বান জনাইছে কচুতলিৰ সমীপৰ বিজনী-গুমৰীয়া আদি অঞ্চলৰ ৰাইজে। এক সংবাদমেলযোগে এই আহ্বান জনাই ৰাইজে। ৰাইজৰ আশা, প্ৰকল্পসমূহৰ কাম আৰম্ভ হ’লে কচুলিত চলি থকা বেদখলৰ অপচেষ্টা মষিমূৰ হ’ব।
