‘যোৱা তিনিখন মেচৰ পৰাজয় এক বাস্তৱ সত্য যদিও আমি ইতিমধ্যে মনৰ পৰা সেয়া আঁতৰি পেলাইছো৷ আমি গুৱাহাটীলৈ আহিছো ইতিবাচক মানসিকতাৰে৷ আমাৰ লক্ষ্য কাইলৈৰ মেচত জয় অৰ্জন কৰা৷ দলৰ লগতে ময়ো আশাবাদী কাইলৈৰ মেচখনত আমি সুন্দৰ প্ৰদৰ্শন কৰিব পাৰিম৷ কাৰণ গুৱাহাটীৰ উইকেট তুলনামুলকভাবে চেন্নাইৰ উইকেটতকৈ উন্নত৷ এয়া মোৰ ঘৰুৱা উইকেট আৰু মই এই উইকেটৰ চৰিত্ৰৰ বিষয়েও ভালদৰে অবগত৷ কাইলৈ এখন হাইস্ক’ৰিং মেচ হ’ব আৰু খেলৰ ফলাফলো আমাৰ পক্ষতে থাকিব৷’ এই মন্তব্য ৰাজস্থান ৰয়েলছৰ বেটাৰ তথা অসম সন্তান ৰিয়ান পৰাগৰ৷উল্লেখ্য যে চলিত আই পি এলৰ অন্তিম দুখন লীগ মেচত অংশ লোৱাৰ বাবে গুৱাহাটীলৈ অহা ৰাজস্থান ৰয়েলছে কাইলৈ বৰ্ষাপাৰাৰ এ চি এ ষ্টেডিয়ামত পঞ্জাৱ কিংছৰ বিৰুদ্ধে খেলিব৷ কাইলৈৰ মেচত জয়লাভ কৰিলেই ৰয়েলছৰ প্লে-অফৰ যোগ্যতাও আনুষ্ঠানিকভাবে গুৱাহাটীতেই সম্পন্ন হ’ব৷
সেয়েহে গুৱাহাটীক নিজৰ দ্বিতীয় ঘৰ হিচাপে লোৱা ইণ্ডিয়ান প্ৰিমিয়াৰ লীগ [আই পি এল] ৰ প্ৰথম ছিজনৰ চেম্পিয়ন ৰাজস্থান ৰয়েলছে কাইলৈৰ মেচখনত সফলতা অৰ্জন কৰি পুনৰ জয়ৰ ছন্দলৈ প্ৰত্যাৱৰ্তনৰ চেষ্টা কৰিব বুলি আজি দৃঢ়তাৰে সংবাদমেলত ব্যক্ত কৰে ৰিয়ানে৷চলিত ১৭ সংখ্যক আই পি এলত নক্ষত্ৰৰ দৰে উজ্বলি উঠা ৰিয়ানে ইতিমধ্যে খেলা ১২ খন মেচত ৪৮৩ ৰাণ কৰিছে৷ বিশ্বৰ ক্ৰিকেটপ্ৰেমীৰ প্ৰশংসা বুটলি গৌৰৱৰে জন্মভূমিলৈ অহা ৰিয়ানে নিজৰ ধাৰাবাহিকতা ঘৰুৱা সমৰ্থকৰ সন্মুখতো ধৰি ৰখাৰ চেষ্টা কৰিব বুলি সংবাদমেলত লগতে ব্যক্ত কৰে৷ আনহাতে, ঘৰত খেলাৰ বিষয়টো লৈ চাপ অনুভৱ নকৰে বুলিও ব্যক্ত কৰি ৰয়েলছৰ যুৱ তাৰকাজনে কয় ‘ কাইলৈৰ মেচখনত মই খেলপথাৰত খেলি থাকিলে এইটো নাভাবো যে মই মোৰ ঘৰৰ মানুহৰ সন্মুখত খেলিছো বা অসম আৰু উত্তৰ-পূৱক প্ৰতিনিধিত্ব কৰিছো৷
এয়া বাস্তৱ যদিও সেয়া মনত ভাবি থাকিলে খেলত প্ৰভাৱ পৰিব পাৰে৷ সেয়ে মই চাপ মুক্ত হৈ পূৰ্বৰ ১২ খন মেচত খেলাৰ দৰেই কাইলৈও খেলিম৷’উল্লেখ্য যে ১২ খন মেচত ১৬ পইণ্ট লাভ কৰি সম্প্ৰতি তালিকাৰ দ্বিতীয় স্থানত থকা ৰয়েলছে কাইলৈৰ মেচত অপেনাৰ জ’ছ বাটলাৰ অবিহনে খেলিব৷ বাটলাৰৰ দৰে অভিজ্ঞ ক্ৰিকেটাৰ দলত নথকাটো ৰয়েলছৰ বাবে দুখজনক যদিও খেলত ইয়াৰ প্ৰভাৱ নপৰে বুলি কয় ৰিয়ানে৷ ‘এইবাৰ আমাৰ সফলতাৰ কাৰণেই হৈছে আমি ব্যক্তিগত প্ৰদৰ্শনৰ ওপৰত নিৰ্ভৰশীল নহয়৷ আমি যোৱা তিনিখন মেচত যি ভুল কৰিছো সেয়া শুধৰণি কৰি কাইলৈ নতুন ৰণনীতিৰে খেলপথাৰত নামিব৷’ইফালে, চলিত আই পি এলত নিজৰ প্ৰদৰ্শন সন্দৰ্ভত ৰিয়ানে কয় ‘চাৰি নম্বৰ স্থানত খেলাটো আমাৰ দলীয় সিদ্ধান্ত আছিল৷ মই এই বছৰ ঘৰুৱা ক্ৰিকেটতো চাৰি নম্বৰ স্থানতে খেলিছো৷
দলে যি দায়িত্ব দিছে সেয়া পালন কৰাটোৱে মোৰ লক্ষ্য৷ উইকেট আৰু পৰিৱেশ-পৰিস্থিতি অনুসৰিয়ে মই নিজৰ ইনিংছ আৰম্ভ কৰো তথা¸ লক্ষ্য নিৰ্ধাৰণ কৰো ইনিংছৰ শেষলৈ খেলাৰ বাবে৷’ উল্লেখ্য যে সঞ্জু ছেমছনে নেতৃত্ব দিয়া ৰয়েলছে কাইলৈ পঞ্জাৱ কিংছৰ বিৰুদ্ধে খেলাৰ বিপৰীতে অহা ১৯ মে’ত এ চি এ ক্ৰিকেট ষ্টেডিয়ামত দলটো মুখামুখি হ’ব কলকাতা নাইট ৰাইডাৰ্ছৰ৷ ইতিমধ্যে ১৯ মে’ৰ খেলৰ টিকট আজি শেষ হৈছে৷ যদি গুৱাহাটীৰ ক্ৰিকেটপ্ৰেমীয়ে আই পি এলৰ ৰোমাঞ্চ ল’ব বিচাৰে তেন্তে কাইলৈৰ মেচৰ টিকট এতিয়াও উপলদ্ধ হৈ আছে৷ অনলাইনত বুকমাইশ্ব’ৰ জড়িয়তে টিকট ক্ৰয় কৰা নিৰ্বাচিত অনুৰাগীয়ে ৰিয়ানৰ লগত পৰিচয় হোৱাৰো সুযোগ পাব বুলি ৰয়েলছে জনাইছে৷ ইফালে, কাইলৈৰ মেচৰ দুঘণ্টা পূৰ্বে সাংস্কৃতিক অনুষ্ঠানো অনুষ্ঠিত হ’ব৷
