ৰাষ্ট্ৰীয় ৰাজধানীক্ষেত্ৰ দিল্লীক সোমবাৰে কোবাই যায় প্ৰবল ধুমুহা আৰু বৃষ্টিপাতে। পৰিণতিত সমগ্ৰ মহানগৰীখনতে ব্যাহত হৈ পৰে যানবাহনৰ চলাচল। ৰাজপথত বাগৰি পৰে প্ৰকাণ্ড প্ৰকাণ্ড গছ। ধুমুহা, বৃষ্টিপাতৰ ফলত ব্যাহত হয় যাত্ৰীবাহী বিমানৰো চলাচল। ঘণ্টাত ৫০ৰ পৰা ৮০ কিলোমিটাৰ বেগত অহা এই ধুমুহাৰ তাণ্ডৱৰ ফলত মহানগৰীখনত বিদ্যুত সেৱাও ব্যাহত হৈ পৰে। অৱশ্যে ধুমুহা–বৰষুণৰ ফলত ৪৫ ডিগ্ৰীৰ পৰা ১৮ ডিগ্ৰী ছেলচিয়াছলৈ হ্ৰাস পায় দিল্লীৰ তাপমাত্ৰা। লক্ষ্যনীয়ভাৱে বিগত সময়ছোৱাত প্ৰচণ্ড গৰমে দহিছিল দিল্লীক। অভিলেখ সৃষ্টিকাৰী তাপমাত্ৰাৰ ফলত ব্যাহত হৈ পৰিছিল জনজীৱন।
