ভাৰতীয় অস্ত্ৰৰ শৰণাপন্ন হৈছে ইউনাইটেড আৰৱ এমিৰেটছ

শেহতীয়াভাৱে মধ্যপ্ৰাচ্যত হুথী বিদ্ৰোহীৰ আক্ৰমণ বৃদ্ধি পোৱাৰ পিছত এইবাৰ আত্মৰক্ষাৰ বাবে ভাৰতীয় অস্ত্ৰৰ শৰণাপন্ন হৈছে ইউনাইটেড আৰৱ এমিৰেটছ। নিজৰ আকাশ সীমাৰ সুৰক্ষাৰ বাবে আবুধাবি মহলে ক্ৰয় কৰিব লৈছে বাৰাক এইট ক্ষেপণাস্ত্ৰ। এই ক্ষেপণাস্ত্ৰ যৌথভাৱে বিকশাই তুলিছে ভাৰতৰ DRDO আৰু ইজৰাইলৰ প্ৰতিৰক্ষা মন্ত্ৰণালয়ে। ৭০ কিলোমিটাৰ দূৰত্বলৈকে লক্ষ্যভেদ কৰিব পৰা বাৰাক এইট ক্ষেপণাস্ত্ৰই যাত্ৰা পথতে ধ্বংস কৰিব পাৰে যিকোনো বিমান, বেলিষ্টিক ক্ষেপণাস্ত্ৰ, ড্ৰোণ আৰু ক্ৰুইজ ক্ষেপণাস্ত্ৰ আদি। আনকি ষ্টেলথ বিমানো সাৰি নাযায় বাৰাকৰ আঘাতৰ পৰা। শেহতীয়াভাৱে আজাৰবাইজান আৰু আৰ্মেনিয়াৰ মাজত সংঘটিত যুদ্ধত আজাৰবাইজানে লাভ কৰা দ্ৰুত বিজয়ৰ আঁৰত এক গুৰুত্বপূৰ্ণ ভূমিকা লৈছিল বাৰাক এইট ক্ষেপণাস্ত্ৰই। ইয়াৰে পৰিপ্ৰেক্ষিতত ইউনাইটেড আৰৱ এমিৰেটছে নিৰ্বাচন কৰিছে এই ভাৰতীয় অস্ত্ৰ। আনহাতে, ব্ৰাহ্মোছৰ পিছত ভাৰতীয় বাৰাকৰ এনে এই আন্তঃৰাষ্ট্ৰীয় চাহিদাই দেশৰ প্ৰতিৰক্ষা উদ্যোগক অধিক বিকশাই তুলিব বুলি আশা কৰা হৈছে।