পঞ্জাবৰ লুধিয়ানাত বিষাক্ত গেছৰ প্ৰভাৱত ১১জনকৈ লোকৰ মৃত্যু হয়। লুধিয়ানাৰ ছুৱা ৰোডৰ কাষৰ শ্বেৰপুৰ চ’কত থকা এটা কাৰখানাৰ পৰা এই বিষাক্ত গেছ নিৰ্গত হোৱাৰ ফলত অসুস্থ হৈ পৰে আন ১৫জন লোক। দেওবাৰে পুৱা ৭.১৫ বজাত কাৰখানাটোৰ পৰা বিষাক্ত গেছ নিৰ্গত হোৱাৰ সময়ত কাৰখানাৰ অধিকাংশ শ্ৰমিকেই শুই আছিল। কাৰখানাটোৰ পৰা গেছ নিৰ্গত হোৱাৰ খবৰ পোৱাৰ পিছতে চিকিৎসকৰ এটা দলৰ লগতে উদ্ধাৰকাৰী দল ঘটনাস্থলীত উপস্থিত হয়। NDRF–এ অঞ্চলটোৰ পৰা ততাতৈয়াকৈ স্থানীয় বাসিন্দাৰ লগতে আন শ্ৰমিকসকলক উদ্ধাৰ কৰে যদিও তাৰ পূৰ্বে ১১জন শ্ৰমিকৰ বিষাক্ত গেছ সেৱণৰ ফলত মৃত্যু হয়। অসুস্থ হৈ পৰা আন শ্ৰমিকসকলক স্থানীয় চিকিৎসালয়ত ভৰ্তি কৰোৱা হৈছে। ইপিনে কাৰখানাটোৰ পৰা কি গেছ নিৰ্গত হৈছিল তাক নিশ্চিত কৰিবলৈ প্ৰশাসনে ইতিমধ্যে ব্যৱস্থা গ্ৰহণ কৰিছে। নিহতসকলৰ ভিতৰত ৬জন পুৰুষৰ লগতে ২টি শিশুসহ ৫গৰাকী মহিলা আছে।
