বিশ্বৰ সৰ্ববৃহৎ ক্ৰিপ্ট’কাৰেন্সী এক্সচেঞ্জ কোম্পানীৰ পৰা হেকাৰে চুৰি কৰিলে ৬.৩ বিলিয়ন ডলাৰ মূল্যৰ ক্ৰিপ্ট’কাৰেন্সী

বিশ্বৰ সৰ্ববৃহৎ ক্ৰিপ্ট’কাৰেন্সী এক্সচেঞ্জ কোম্পানী Binanceত সংঘটিত হৈছে বৃহৎ চাইবাৰ আক্ৰমণ। এই আক্ৰমণত হেকাৰে প্ৰায় ৬.৩ বিলিয়ন ডলাৰ মূল্যৰ ক্ৰিপ্ট’কাৰেন্সী চুৰি কৰাৰ অভিযোগ উত্থাপন হৈছে। আমেৰিকাৰ চাইবাৰ সুৰক্ষা বিশ্লেষণ সংস্থা TRM Labs আৰু Chainalysis-এ এই আক্ৰমণৰ আঁৰত উত্তৰ কোৰিয়াৰ হেকিং গোট জড়িত থকা বুলি সন্দেহ প্ৰকাশ কৰিছে।

ঘটনাটোৰ পিছতে ক্ৰিপ্ট’কাৰেন্সীৰ বজাৰত নেতিবাচক প্ৰভাৱ পৰে। বিটকইন, ইথেৰিয়ামসহ কেইবাটাও ডিজিটেল মুদ্ৰাৰ মূল্য হ্ৰাস পায়। পৰিস্থিতি নিয়ন্ত্ৰণৰ বাবে Binance-এ সাময়িকভাৱে ধন উলিওৱাৰ সেৱা বন্ধ কৰে। অৱশ্যে গ্ৰাহকৰ সম্পত্তি সুৰক্ষিত থকা বুলি আশ্বাস দিয়াৰ লগতে চুৰি হোৱা ধনৰ ক্ষতি কোম্পানীটোৱে নিজেই বহন কৰিব বুলি ঘোষণা কৰে।

Binanceৰ মতে, আক্ৰমণৰ সৈতে জড়িত প্ৰায় ৩ বিলিয়ন ডলাৰৰ সম্পত্তি ইতিমধ্যে চিনাক্ত কৰা হৈছে। ষ্টেবলকইন নিৰ্মাতা Tether আৰু Circle-সহ কেইবাটাও সংস্থাই এই সম্পত্তিৰ এটা বৃহৎ অংশ জব্দ কৰিবলৈ সক্ষম হৈছে। Tether-এ প্ৰায় ১.৫৭ বিলিয়ন ডলাৰ আৰু Circle-এ ৮০০ মিলিয়ন ডলাৰতকৈ অধিক মূল্যৰ সম্পত্তি ফ্ৰীজ কৰিছে। World Liberty Financial আৰু ক্ৰিপ্ট’ প্ৰতিষ্ঠান Ripple-য়ো সম্পত্তি জব্দ কৰাৰ ক্ষেত্ৰত সহযোগিতা আগবঢ়াইছে।

Binance-এ ‘X’যোগে প্ৰকাশ কৰা বিবৃতিত কয় যে এইয়া এক জটিল চাইবাৰ আক্ৰমণ আৰু আইনী সংস্থাসমূহৰ সৈতে ঘটনাটোৰ তদন্ত অব্যাহত ৰখা হৈছে। কোম্পানীটোৱে লগতে গ্ৰাহকৰ ধন সুৰক্ষিত থকা বুলি পুনৰ আশ্বাস দিয়ে।

প্ৰাথমিক তদন্তত প্ৰকাশ পোৱা অনুসৰি, Binanceৰ এগৰাকী অভিযন্তাৰ লেপটপ হেক হোৱাৰ জৰিয়তে আক্ৰমণকাৰীয়ে কোম্পানীটোৰ এটা ছিষ্টেমত প্ৰৱেশৰ সুবিধা লাভ কৰিছিল বুলি সন্দেহ কৰা হৈছে।

চাইবাৰ সুৰক্ষা সংস্থা TRM Labs-এ এই আক্ৰমণৰ আঁৰত উত্তৰ কোৰিয়াৰ এটা বিশেষ হেকিং গোট জড়িত থকা বুলি দাবী কৰিছে। Chainalysis-য়েও উত্তৰ কোৰিয়াৰ জড়িত থকাৰ সম্ভাৱনাক লৈ উচ্চ আস্থাৰে মত প্ৰকাশ কৰিছে। বিশ্লেষকসকলৰ মতে, ২০২৫ চনত ক্ৰিপ্ট’ এক্সচেঞ্জ Bybitত সংঘটিত বৃহৎ চাইবাৰ চুৰিৰ ঘটনাৰ সৈতে এই আক্ৰমণৰ যথেষ্ট সাদৃশ্য আছে। সেই ঘটনাৰ বাবে আমেৰিকাৰ Federal Bureau of Investigation (FBI)-এ উত্তৰ কোৰিয়াক জগৰীয়া কৰিছিল।

এই আক্ৰমণৰ প্ৰভাৱ ক্ৰিপ্ট’কাৰেন্সীৰ বজাৰতো স্পষ্ট হৈ পৰে। বিটকইনৰ মূল্য ছয় সপ্তাহৰ ভিতৰত সৰ্বনিম্ন ৭৬,৩৬৮ ডলাৰলৈ হ্ৰাস পোৱাৰ বিপৰীতে ইথেৰিয়ামৰ মূল্য ৩ শতাংশতকৈ অধিক কমি ২,১৭৮ ডলাৰ হয়। Binanceৰ সৈতে জড়িত BNB টোকেনৰ মূল্যও ৫ শতাংশ হ্ৰাস পায়। আনহাতে, আমেৰিকাৰ ক্ৰিপ্ট’ এক্সচেঞ্জ Coinbaseৰ শ্বেয়াৰৰ মূল্য ৪.৮ শতাংশ হ্ৰাস পোৱাৰ লগতে Bitcoin বিনিয়োগকাৰী প্ৰতিষ্ঠান Strategyৰ শ্বেয়াৰৰ মূল্য প্ৰায় ৬ শতাংশ কমে।

উল্লেখ্য যে, Binanceৰ বিশ্বজুৰি প্ৰায় ৩৩.৫ কোটি পঞ্জীয়নভুক্ত ব্যৱহাৰকাৰী আছে। ২০২৫ চনৰ বাৰ্ষিক প্ৰতিবেদন অনুসৰি, এক্সচেঞ্জটোৰ জিম্মাত প্ৰায় ১৬২.৮ বিলিয়ন ডলাৰৰ ডিজিটেল সম্পত্তি আছিল। গ্ৰাহকৰ সম্পত্তিৰ সুৰক্ষাৰ বাবে কোম্পানীটোৱে ১ বিলিয়ন ডলাৰৰ Bitcoin Reserve-ও গঠন কৰি ৰাখিছে।

বিশেষজ্ঞসকলৰ মতে, এই ঘটনাই ক্ৰিপ্ট’কাৰেন্সীত বিনিয়োগকাৰীৰ মাজত উদ্বেগ বৃদ্ধি কৰিব পাৰে। চুৰি হোৱা সম্পত্তিৰ কিমানখিনি উদ্ধাৰ কৰা সম্ভৱ হয় আৰু ঘটনাটোৰ ফলত ক্ৰিপ্ট’ বজাৰত কিমান দূৰলৈ প্ৰভাৱ পৰে, সেয়া পৰৱৰ্তী তদন্ত আৰু সম্পত্তি উদ্ধাৰৰ প্ৰক্ৰিয়াৰ ওপৰত নিৰ্ভৰ কৰিব।

NKTV Digital
Author: NKTV Digital

Popular

More like this
Related

অষ্ট্ৰেলিয়াত বসবাস কৰা প্ৰৱাসী অসমীয়াৰ সৈতে অসম বিধানসভাৰ অধ্যক্ষ ৰণজিৎ কুমাৰ দাসৰ মত-বিনিময়

ফিজিত অনুষ্ঠিত কমনৱেলথ ওমেন পাৰ্লিয়ামেণ্টেৰীয়ান ৱৰ্কশ্বপৰ ষ্টাডি ট্যুৰৰ অংশ...

আন্তঃৰাষ্ট্ৰীয় মঞ্চত উজলিল অসমীয়া ছবি ‘আদিশক্তি’, লাছ ভেগাছ ইণ্ডি এৱাৰ্ডত ‘শ্ৰেষ্ঠ ছবি’ৰ সন্মান

মুক্তিৰ পূৰ্বেই ৰাষ্ট্ৰীয় আৰু আন্তঃৰাষ্ট্ৰীয় পৰ্যায়ত অসমীয়া চলচ্চিত্ৰ জগতলৈ...

চীনত ট্ৰাম্প, জিনপিং আৰু পুটিনৰ ঐতিহাসিক বৈঠক: বিশ্ব ৰাজনীতি আৰু ইউক্ৰেইন যুদ্ধক লৈ কি আলোচনা হ’ল?

আমেৰিকাৰ ৰাষ্ট্ৰপতি ড’নাল্ড ট্ৰাম্প, চীনৰ ৰাষ্ট্ৰপতি ঝি জিনপিং আৰু...