উত্তৰাখণ্ডৰ যোশীমঠত প্ৰচণ্ড তুষাৰপাতৰ মাজতে সংঘটিত হৈছে এক ভয়ংকৰ হেলিকপ্টাৰ দুৰ্ঘটনা। পাইলটসহ মুঠ ৬জন লোক আছিল হেলিকপ্টাৰখনত। ব্যক্তিগত সংস্থা Trans Bharat Aviation Pvt Ltd-ৰ মালিকানাধীন হেলিকপ্টাৰখনে বদ্ৰীনাথৰ পৰা দুপৰীয়া প্ৰায় ১ বাজি ১৪ মিনিটত ডেৰাডুন অভিমুখে উৰা মাৰিছিল।
বিষয়াই প্ৰকাশ কৰা মতে, যোশীমঠ উপত্যকাৰ ওপৰেৰে উৰি থকাৰ সময়তে হেলিকপ্টাৰখনৰ সৈতে যোগাযোগ বিচ্ছিন্ন হয়। বৰ্তমানলৈকে হেলিকপ্টাৰ খনৰ সঠিক অৱস্থান নিশ্চিত কৰিব পৰা হোৱা নাই বুলি উত্তৰাখণ্ড অসামৰিক বিমান পৰিবহণ উন্নয়ন প্ৰাধিকৰণে জানিবলৈ দিছে।
উত্তৰাখণ্ডৰ মুখ্যমন্ত্ৰী পুষ্কৰ সিং ধামীয়ে সামাজিক মাধ্যমযোগে জানিবলৈ দিয়া মতে, ছাইএন (Chaien) গাঁৱৰ সমীপত দুৰ্ঘটনাত পতিত হৈছে হেলিকপ্টাৰখন।
ঘটনাস্থলীত জিলা প্ৰশাসন, দুৰ্যোগ ব্যৱস্থাপনা বিভাগ আৰু ৰাজ্যিক দুৰ্যোগ সঁহাৰি বাহিনী (SDRF)-এ যৌথভাৱে উদ্ধাৰ অভিযান চলাই আছে। মুখ্যমন্ত্ৰীগৰাকীয়ে সমগ্ৰ ঘটনাৰ ওপৰত নিৰন্তৰ নজৰ ৰাখিছে বুলিও উল্লেখ কৰিছে।
