অহা তিনি জুলাইৰ পৰা ব্ৰিটেইনৰ বাৰ্মিংহামত আৰম্ভ হ’ব বিশ্ব চেম্পিয়নশ্বিপ অৱ লিজেণ্ডছ ক্ৰিকেট৷ প্ৰতিযোগিতাত অংশ ল’ব ভাৰত, অষ্ট্ৰেলিয়া, পাকিস্তান, ইংলেণ্ড, দক্ষিণ আফ্ৰিকা, ৱেষ্ট ইণ্ডিজসহ মুঠ ছটা দলে৷ যুৱৰাজ সিং, শ্বাহিদ আফ্ৰিদি, ব্ৰেট লী, ইয়ান বেল, ডেৰেন ছেমীৰ দৰে কিংবদন্তি খেলুৱৈয়ে প্ৰতিযোগিতাখনত খেলিব৷ ইফালে, ইজমাইট্ৰিপ ভ্ৰমণ পতিষ্ঠানটোৱে বিশ্ব চেম্পিয়নশ্বিপ অৱ লিজেণ্ডছ অংশীদাৰ হিচাপে প্ৰতিযোগিতাত জড়িত হৈছে বুলি ব্যক্ত কৰিছে স্বত্বাধিকাৰী নিশান্ত পিট্টীয়ে৷
এই সম্পৰ্কত তেওঁ কয় ‘আমি বিশ্ব চেম্পিয়নশ্বিপ অৱ লিজেণ্ডছৰ অংশীদাৰ হ’বলৈ পাই আনন্দিত হৈছো৷ এই সহযোগিতাই ক্ৰীড়াৰ উৎকৰ্ষতাক সমৰ্থন কৰা আৰু বিশ্বজুৰি ক্ৰিকেট অনুৰাগীসকলক অতুলনীয় অভিজ্ঞতা প্ৰদানৰ প্ৰতি আমাৰ দায়বদ্ধতাক প্ৰতিফলিত কৰিব৷’ উল্লেখ্য যে প্ৰতিযোগিতাত ভাৰতৰ সুৰেশ ৰাইনা, হৰভজন সিং আদিৰ দৰে ক্ৰিকেটাৰে অংশ লোৱাৰ লগতে বলীউডৰ অভিনেতা অজয় দেৱগনেও প্ৰচাৰত জড়িত হ’ব বুলি কয় মুখ্য কাৰ্যবাহী বিষয়া হৰ্ষিত টোমাৰে৷
