দীপাৱলীৰ পূৰ্বে কেন্দ্ৰীয় কৰ্মচাৰী আৰু পেঞ্চনাৰৰ বাবে এটা সুখবৰ। কেন্দ্ৰীয় মন্ত্ৰীসভাই মহাৰ্ঘ ভাট্টা (DA)ত ৩ শতাংশ বৃদ্ধিৰ অনুমোদন জনাইছে। ইয়াৰ ফলত মুঠ DA ৫৫ শতাংশৰ পৰা বাঢ়ি ৫৮ শতাংশ হ’ব। এই সিদ্ধান্তৰ ফলত দেশৰ প্ৰায় ১.১৫ কোটি কেন্দ্ৰীয় কৰ্মচাৰী আৰু পেঞ্চনাৰ প্ৰত্যক্ষভাৱে লাভৱান হ’ব।
জানুৱাৰীত ২% DA বৃদ্ধি হৈছিল
এই বছৰৰ জানুৱাৰী মাহত কেন্দ্ৰীয় চৰকাৰে মহাৰ্ঘ ভাট্টাত ২ শতাংশ বৃদ্ধি কৰিছিল। তেতিয়া DA ৫৩ শতাংশৰ পৰা বাঢ়ি ৫৫ শতাংশ হৈছিল। এতিয়া জুলাইৰ পৰা আৰু ৩ শতাংশ বৃদ্ধিৰ ফলত DA ৫৮ শতাংশত উপনীত হ’ব। এই বৃদ্ধি সপ্তম কেন্দ্ৰীয় বেতন আয়োগৰ পৰামৰ্শৰ সৈতে সঙ্গতিপূৰ্ণভাৱে কৰা হৈছে।
কেন্দ্ৰীয় চৰকাৰৰ এই সিদ্ধান্ত ১ জুলাই ২০২৫ৰ পৰা কাৰ্যকৰী হ’ব, কিন্তু ইয়াৰ পৰিশোধ অক্টোবৰ ২০২৫ৰ বেতনৰ সৈতে কৰা হ’ব। অৰ্থাৎ, জুলাই, আগষ্ট আৰু ছেপ্টেম্বৰৰ তিনিমাহৰ অতিৰিক্ত DA কৰ্মচাৰী আৰু পেঞ্চনাৰে অক্টোবৰৰ বেতনৰ সৈতে একেলগে পাব।
প্ৰতিমাহে বেতনত কিমান বৃদ্ধি হ’ব?
ধৰি লওক এজন কৰ্মচাৰীৰ মৌলিক বেতন ৫০,০০০ টকা। পূৰ্বে তেওঁৰ মহাৰ্ঘ ভাট্টাৰ হাৰ আছিল ৫৫ শতাংশ, অৰ্থাৎ তেওঁ ৫৫% × ৫০,০০০ = ২৭,৫০০ টকা DA হিচাপে পাইছিল। এতিয়া চৰকাৰে DAৰ হাৰ বাঢ়ি ৫৮ শতাংশ কৰিছে, গতিকে এতিয়া তেওঁ ৫৮% × ৫০,০০০ = ২৯,০০০ টকা পাব।
এইদৰে, DA বৃদ্ধিৰ ফলত তেওঁৰ মুঠ বেতনত প্ৰতিমাহে ২৯,০০০ – ২৭,৫০০ = ১,৫০০ টকাৰ বৃদ্ধি হ’ব। অৰ্থাৎ, কৰ্মচাৰীৰ হাতত প্ৰতিমাহে ১,৫০০ টকা অতিৰিক্ত আহিব।
একেদৰে, এজন পেঞ্চনাৰৰ (অৱসৰপ্ৰাপ্ত ব্যক্তি) কথা ধৰক, যাৰ মৌলিক পেঞ্চন ২৫,০০০ টকা। পূৰ্বে তেওঁৰ মহাৰ্ঘ সাহায্য (Dearness Relief (DR) আছিল ৫৫ শতাংশ, অৰ্থাৎ তেওঁ ৫৫% × ২৫,০০০ = ১৩,৭৫০ টকা পাইছিল। এতিয়া DR বাঢ়ি ৫৮ শতাংশ হোৱাত তেওঁ ৫৮% × ২৫,০০০ = ১৪,৫০০ টকা পাব।
এই পৰিৱৰ্তনৰ ফলত পেঞ্চনাৰৰ পেঞ্চনত প্ৰতিমাহে ১৪,৫০০ – ১৩,৭৫০ = ৭৫০ টকাৰ বৃদ্ধি হ’ব। অৰ্থাৎ, পেঞ্চনাৰে প্ৰতিমাহে ৭৫০ টকা অতিৰিক্ত পাব।
এই ৩ শতাংশ বৃদ্ধিৰ ফলত চৰকাৰৰ ওপৰত বছৰি ১০,০৮৪ কোটি টকাৰ অতিৰিক্ত বোজা পৰিব। এই বৃদ্ধি মহাৰ্ঘৰ চাপৰ পৰিপ্ৰেক্ষিতত কৰ্মচাৰী আৰু পেঞ্চনাৰৰ জীৱন-যাপনৰ ব্যয় সন্তুলিত ৰাখিবলৈ এটা পদক্ষেপ। কেন্দ্ৰীয় চৰকাৰে অহৰহ চেষ্টা কৰি আছে যাতে মহাৰ্ঘৰ ক্ৰমবৰ্ধমান প্ৰভাৱ হ্ৰাস কৰা হয় আৰু কৰ্মচাৰীসকলক আৰ্থিক নিৰাপত্তা প্ৰদান কৰা হয়।
