ইম্পছিবল নামৰ অপৰাধ আৰু নিৰাপত্তা বিষয়ক টেলিভিছন অনুষ্ঠানৰ জৰিয়তে পৰিচিত হোৱা ছাৰাহ খালিফাক এটা বৃহৎ ড্ৰাগছ সৰবৰাহ গোচৰত মৃত্যুদণ্ডৰ শাস্তি প্ৰদান কৰিছে ইজিপ্তৰ এখন আদালতে। খালিফাৰ সৈতে আন ১১জন অভিযুক্তকো মৃত্যুদণ্ড দিয়া হৈছে।
৩৯ বছৰীয়া খালিফা কেৱল বাতৰি উপস্থাপকই নহয়, তেওঁ এখন ছাৰ্জাৰী ক্লিনিকৰ মালিক। ইয়াৰ উপৰি পাৰ্টী আৰু বিভিন্ন অনুষ্ঠান আয়োজন কৰা এটা প্ৰডাকচন কোম্পানীও তেওঁ চলায়।
কি অভিযোগ উঠিছিল খালিফাৰ বিৰুদ্ধে?
ইজিপ্তৰ চৰকাৰী সংবাদমাধ্যম আল-আহৰামৰ প্ৰতিবেদন অনুসৰি, আদালতে খালিফা আৰু আন অভিযুক্তসকলক এটা সংগঠিত অপৰাধী চক্ৰৰ সৈতে জড়িত বুলি দোষী সাব্যস্ত কৰে।
অভিযোগ অনুসৰি, চক্ৰটোৱে বিদেশৰ পৰা ড্ৰাগছ প্ৰস্তুতৰ বাবে প্ৰয়োজনীয় কেঁচামাল আমদানি কৰি ড্ৰাগছ প্ৰস্তুত কৰিছিল। চক্ৰটোৰ সদস্যসকলৰ মাজত কেঁচামাল আমদানি, ড্ৰাগছ প্ৰস্তুত আৰু বজাৰত বিতৰণৰ বিভিন্ন দায়িত্ব ভাগ কৰা হৈছিল বুলি তদন্তকাৰীয়ে দাবী কৰে।
তদন্তৰ সময়ত কৰ্তৃপক্ষই ৭৫০ কিলোগ্ৰামতকৈ অধিক নিচাজাতীয় সামগ্ৰী আৰু ড্ৰাগছ প্ৰস্তুতৰ কেঁচামাল জব্দ কৰাৰ কথা প্ৰকাশ কৰিছে। ড্ৰাগছৰ ‘লেবৰেটৰী’ হিচাপে ব্যৱহাৰ কৰা হৈছিল বুলি অভিযোগ উঠা দুটা এপাৰ্টমেণ্টো উদ্ধাৰ কৰা হয়। তাত অনুজ্ঞাপত্ৰবিহীন আগ্নেয়াস্ত্ৰ আৰু গুলীও পোৱা গৈছিল বুলি প্ৰতিবেদনত প্ৰকাশ।
অভিযোগ অস্বীকাৰ কৰিছে খালিফাই
অৱশ্যে আৰম্ভণিৰে পৰা নিজৰ বিৰুদ্ধে উঠা অভিযোগ অস্বীকাৰ কৰি আহিছে ছাৰাহ খালিফাই।
এটা শুনানিৰ সময়ত তেওঁ বিচাৰকক জনোৱা বুলি প্ৰতিবেদনত প্ৰকাশ যে, এণ্টি-নাৰ্কটিকছ কৰ্তৃপক্ষৰ কাৰ্যালয়ত ড্ৰাগছৰ সৈতে তেওঁৰ ফটো তোলাৰ পূৰ্বে তেওঁ কেতিয়াও ড্ৰাগছ দেখা নাছিল। আনকি জীৱনত কেতিয়াও চিগাৰেট নোখোৱাৰ কথাও তেওঁ তদন্তকাৰীক জনোৱা বুলি প্ৰকাশ পাইছে।
ইজিপ্তৰ সংবাদমাধ্যমৰ মতে, আদালতত খালিফা আৱেগিক হৈ পৰিছিল আৰু বিচাৰকৰ ওচৰত দয়া বিচাৰিছিল। তেওঁ নিজৰ পৰিয়ালৰ কথা উল্লেখ কৰি নিজকে ড্ৰাগছৰ ধনৰ প্ৰয়োজন নথকা এগৰাকী ব্যক্তি হিচাপে উপস্থাপন কৰিছিল।
কিহৰ ওপৰত ভিত্তি কৰি চলিল গোচৰ?
আল-আহৰামৰ মতে, গোচৰটোৰ শুনানিত ২০জন সাক্ষীৰ বক্তব্যৰ লগতে বিভিন্ন কাৰিকৰী আৰু ডিজিটেল প্ৰমাণ উপস্থাপন কৰা হৈছিল।
অভিযোগপক্ষই মেছেজ, ফটোগ্ৰাফ আৰু ভিডিঅ’কে ধৰি বিভিন্ন ডিজিটেল তথ্যক চক্ৰটোৰ কাৰ্যকলাপৰ সৈতে সম্পৰ্কিত প্ৰমাণ হিচাপে ব্যৱহাৰ কৰা বুলি জানিব পৰা গৈছে।
খালিফাক ২০২৫ চনৰ এপ্ৰিল মাহত কায়ৰোত গ্ৰেপ্তাৰ কৰা হৈছিল। পিছত তদন্ত আগবঢ়াৰ লগে লগে তেওঁৰ বিৰুদ্ধে গ্ৰেপ্তাৰী পৰোৱানাও জাৰি কৰা হৈছিল।
আদালতৰ ৰায় আৰু পৰৱৰ্তী পদক্ষেপ
খালিফাৰ সৈতে আন ১১জন অভিযুক্তক মৃত্যুদণ্ড দিয়া হৈছে। আনহাতে, নজন অভিযুক্তক যাৱজ্জীৱন কাৰাদণ্ড দিয়া হৈছে।
মৃত্যুদণ্ডৰ ৰায়টো প্ৰথমে যোৱা মাহতে ঘোষণা কৰা হৈছিল। কিন্তু ইজিপ্তত মৃত্যুদণ্ডৰ গোচৰত গ্ৰেণ্ড মুফতিৰ ধৰ্মীয় মতামত লোৱাটো এক প্ৰয়োজনীয় প্ৰক্ৰিয়া। সেই প্ৰক্ৰিয়া সম্পূৰ্ণ হোৱাৰ পিছতে ৰায়টো আনুষ্ঠানিকভাৱে নিশ্চিত কৰা হয়।
ইফালে, খালিফাৰ অধিবক্তাই ইতিমধ্যে ৰায়টোৰ বিৰুদ্ধে আপীল কৰাৰ কথা ঘোষণা কৰিছে।
ইজিপ্তত মৃত্যুদণ্ডক লৈ বিতৰ্ক
ইজিপ্তত পৰিকল্পিত হত্যাকাণ্ড, সন্ত্ৰাসবাদ, ধৰ্ষণৰ অপৰাধ আৰু ড্ৰাগছ সৰবৰাহকে ধৰি কেইবাটাও গুৰুতৰ অপৰাধৰ ক্ষেত্ৰত মৃত্যুদণ্ডৰ ব্যৱস্থা এতিয়াও বাহাল আছে।
অৱশ্যে মানৱ অধিকাৰ সংগঠনসমূহে দেশখনত মৃত্যুদণ্ডৰ ব্যৱহাৰক লৈ দীৰ্ঘদিন ধৰি উদ্বেগ প্ৰকাশ কৰি আহিছে।
এমনেষ্টি ইণ্টাৰনেচনেলৰ তথ্য অনুসৰি, ২০২৫ চনত ইজিপ্তত ৪৯২টা মৃত্যুদণ্ডৰ ৰায় ঘোষণা কৰা হৈছিল আৰু সেই বছৰত ২৩টা মৃত্যুদণ্ড কাৰ্যকৰী কৰা হৈছিল।
