কেইদিনমান আগতে খবৰ পোৱা গৈছিল যে, শ্বাহৰুখ খান ছুটিং চেটত গুৰুতৰভাৱে আঘাতপ্ৰাপ্ত হৈছে। তেওঁৰ কন্যা ছুহানা খানৰ সৈতে আগন্তুক ছবি ‘কিং’ৰ ছুটিঙৰ সময়ত এই দুৰ্ঘটনা ঘটিছিল বুলি জনা গৈছিল। কেইবামাহ ধৰি লণ্ডনৰ বিভিন্ন ঠাইত এই ছবিৰ ছুটিং চলি আছে। এই সময়ত শুনা গৈছিল যে, অভিনেতাজনৰ পেশীত আঘাত লাগিছে। ছুটিং মাজতে বন্ধ কৰি তেওঁ চিকিৎসাৰ বাবে আমেৰিকালৈ যাবলগীয়া হৈছিল।
যদিও পিছত এই খবৰক কিছুমানে মিছা বুলি দাবী কৰিছিল। বিগত কেইদিনমান ধৰি শ্বাহৰুখক ক’তো দেখা পোৱা নাছিল। কিন্তু শুকুৰবাৰে এটা বিশেষ বঁটা ঘোষণাৰ পিছত তেওঁ প্ৰকাশ্যলৈ আহিল। তেওঁৰ পৰিধানত আছিল ক’লা টি-চাৰ্ট, ডেনিম পেণ্ট, মূৰত ক’লা টুপী। শ্বাহৰুখে কৃতজ্ঞতা প্ৰকাশ কৰিলে। সেই ভিডিঅ’ত তেওঁৰ হাতত বেণ্ডেজ বন্ধা দেখা গৈছিল।
স্বাভাৱিকভাৱে সকলোৰে মনত কৌতুহল জাগিছে, শ্বাহৰুখে সঁচাকৈয়ে গুৰুতৰ আঘাত পাইছেনে? তথাপি অভিনেতাজনে অনুৰাগীসকলক চিন্তা নকৰিবলৈ আহ্বান জনাইছে। তেওঁ কৈছে, “মই দুয়োহাত মেলি সকলোকে কৃতজ্ঞতা আৰু মৰম জনাব বিচাৰোঁ। কিন্তু এতিয়া তেনে কৰিব পৰা নাই। চিন্তা নকৰিব। পপকৰ্ণৰ সৈতে সাজু থাকক। অতি সোনকালে প্ৰেক্ষাগৃহত আমাৰ সাক্ষাৎ হ’ব।”
সূত্ৰৰ খবৰ অনুসৰি, কেইবাসপ্তাহ আগতে মুম্বাইৰ গোল্ডেন ট’বেকো ষ্টুডিঅ’ত শ্বাহৰুখ এটা একশ্যন দৃশ্যৰ ছুটিঙত ব্যস্ত আছিল। সেই সময়ত ষ্টাণ্ট কৰোঁতে তেওঁ আঘাতপ্ৰাপ্ত হয়। বৰ্তমান ‘কিং’ ছবিৰ ছুটিং কেইদিনমানৰ বাবে বন্ধ ৰখা হৈছে। অভিনেতাজন সম্পূৰ্ণ সুস্থ হৈ উঠিলে বাকীখিনি কাম জোৰদাৰভাৱে সম্পূৰ্ণ কৰিব।
