কেন্দ্ৰীয় ৰাজ্যিক বিদেশ মন্ত্ৰী পবিত্ৰ মাৰ্ঘেৰিটাই যোৱা ১৯ আৰু ২০ অক্টোবৰত দুদিনীয়া কাৰ্যসূচীৰে ভাৰতৰ সামুদ্ৰিক প্ৰতিৱেশী ৰাষ্ট্ৰ ইণ্ডোনেছিয়া ভ্ৰমণ কৰে । এই ভ্ৰমণছোৱাত মন্ত্ৰীগৰাকীয়ে যোৱা ২০ অক্টোবৰত জাকাৰ্টাস্থিত ইণ্ডোনেছিয়াৰ সংসদ ভৱনত অনুষ্ঠিত দেশখনৰ নৱ-নিৰ্বাচিত ৰাষ্ট্ৰপতি প্ৰব’ৱো চুবিয়ান্তো আৰু উপ-ৰাষ্ট্ৰপতি গিব্ৰান ৰাকাবুমিং ৰাকাৰ শপত গ্ৰহণ অনুষ্ঠানত উপস্থিত থাকি দুয়োগৰাকী নেতাক ভাৰতৰ প্ৰধানমন্ত্ৰী নৰেন্দ্ৰ মোদীৰ হৈ শুভেচ্ছা জ্ঞাপন কৰে । তদুপৰি এই ভ্ৰমণকালত বিদেশ মন্ত্ৰীগৰাকীয়ে ইণ্ডোনেছিয়াত থকা ভাৰতৰ আগশাৰীৰ কোম্পানীসমূহৰ মুখ্য কাৰ্যবাহী বিষয়াসকলৰ সৈতেও এক মত-বিনিময় অনুষ্ঠানত অংশ লয় । উল্লেখযোগ্য যে ইণ্ডোনেছিয়া ভাৰতৰ সামগ্ৰিক বিকাশ নীতিৰ এক অংশীদাৰী ৰাষ্ট্ৰ আৰু দেশখনৰ নৱ-নিৰ্বাচিত ৰাষ্ট্ৰপতিৰ শপত গ্ৰহণ অনুষ্ঠানত ভাৰতৰ বিদেশ মন্ত্ৰীগৰাকীৰ উপস্থিতিয়ে দুয়োখন দেশৰ দীৰ্ঘদিনীয়া বন্ধুত্বৰ সম্পৰ্কক পুনৰবাৰ সুনিশ্চিত কৰিছে।
