গুৱাহাটীত কালি সমাপ্ত হোৱা “অসমী চৰচ মেলা ২০২৩-২৪” ত সৰ্বমুঠ ৮ কোটি ৭৫ লাখ টকাৰ বিক্ৰী হৈছে বুলি পঞ্চায়ত আৰু গ্ৰামোন্নয়ন বিভাগৰ মন্ত্ৰী ৰণজিৎ কুমাৰ দাসে সদৰি কৰে ৷ মন্ত্ৰীগৰাকীয়ে কয় যে, এইবাৰৰ চৰচ মেলাত অসমৰ স্থানীয় আত্মসহায়ক গোটৰ বিপণীয়ে বিক্ৰী কৰিছে ৫ কোটি ৫৩ লাখ টকা ৷ অন্যান্য ৰাজ্যৰ আত্মসহায়ক গোটৰ বিপণীয়ে বিক্ৰী কৰিছে ৩ কোটি ২২ লাখ টকা ৷ মন্ত্ৰী গৰাকীয়ে আৰু কয় যে, এই মেলাৰ সময়ছোৱাত ডিজিপে সখীয়ে ১,২০১ টা ডিজিটেল লেনদেনৰ জৰিয়তে মুঠ ৯৯ লাখ ১০ হাজাৰ টকাৰ লেনদেন কৰিছে। ইয়াৰোপৰি, আত্মসহায়ক গোটৰ সদস্যাসকলে মুঠ ৭৫ লাখ ৬ হাজাৰ টকাৰ সা-সামগ্ৰীৰ অৰ্ডাৰো লাভ কৰিছে বুলি মন্ত্ৰী গৰাকীয়ে জানিবলৈ দিয়ে ৷ এই মেলাই আত্মসহায়ক গোটৰ মহিলাসকলক আত্মনিৰ্ভৰশীল হোৱাৰ লগতে আগন্তুক দিনৰ বাবে উৎসাহিত কৰিছে বুলি মন্ত্ৰী গৰাকীয়ে মন্তব্য কৰে ৷
উল্লেখযোগ্য যে, এই মেলাত আত্মসহায়ক গোটৰ সদস্যাসকলে মুঠ ১৩২ খন বিপণীত নিজে প্ৰস্তুত কৰা হস্তশিল্প, বস্ত্ৰৰ লগতে খাদ্য-সামগ্ৰীও বিক্ৰী কৰিছিল ৷ এই ১৩৪ খন বিপণীৰ ভিতৰত ৬৩ খন বিপণীয়েই আছিল অসমৰ আত্মসহায়ক গোটৰ। অসমৰ উপৰিও এই মেলাত অন্ধ্ৰপ্ৰদেশ, অৰুণাচল প্ৰদেশ, ছত্তিশগড়, গোৱা, গুজৰাট, হাৰিয়ানা, হিমাচল প্ৰদেশ, জম্মু-কাশ্মীৰ, ঝাৰখণ্ড, কৰ্ণাটক, লাডাখ, মধ্যপ্ৰদেশ, মহাৰাষ্ট্ৰ, মেঘালয়, পুডুচেৰী, পঞ্জাৱ, ৰাজস্থান, তেলেংগানা, উত্তৰপ্ৰদেশ, উত্তৰাখণ্ড, পশ্চিমবংগকে আদি কৰি প্ৰায় ২১ খন ৰাজ্যই অংশগ্ৰহণ কৰিছিল ।
