এই চহৰলৈ আহিল ফাগুণৰ প্ৰথমজাক বৰষুণ। ধূলিৰে ধূসৰিত গুৱাহাটী মহানগৰীৰ বাসিন্দাসকলে অপেক্ষা কৰি আছিল এজাক বৰষুণৰ বাবে। কিয়নো এজাক বৰষুণেহে শুকান বতৰ, ধূলি, বায়ু প্ৰদূষণ আদিৰ পৰা মহানগৰবাসীক সকাহ দিব পাৰে। একপ্ৰকাৰ মহানগৰবাসীৰ বাবে সপোন হৈ পৰিছিল বৰষুণজাক। প্ৰকৃতিয়েও যেন শুনিলে মহানগৰবাসীৰ কথা।
কেইবাটাও মাহৰ অপেক্ষাৰ অৱসান ঘটাই অৱশেষত আহিল ফাগুনৰ বৰষুণজাক। শুকুৰবাৰৰ সন্ধিয়াৰ পৰাই গোমা হৈ পৰিল গুৱাহাটীৰ আকাশ। লাহে লাহে বৈ আছিল ফাগুণৰ পছোৱা বতাহ। ইয়াৰ সমান্তৰালভাৱে মহানগৰীলৈ নামি আহিল এজাক কিনকিনীয়া বৰষুণ। ধূলিৰ উৰণি ঠেলি পাতলীয়া বৰষুণজাক নামি আহিল এই চহৰলৈ। বৰষুণৰ পৰশ পাই যেন এই চহৰ সজীৱ উঠিল পুনৰবাৰ।
