সদৌ অসম ডায়েট বিষয়া সন্থাৰ উদ্যোগত তথা জিলা শিক্ষা আৰু প্ৰশিক্ষণ প্ৰতিষ্ঠান, (ডায়েট) ধেমাজিৰ সহযোগত ”Teacher Education in Contemporary Times: Prospects and Challenges in the Light of NEP 2020″ শীৰ্ষক এখনি ৰাষ্ট্ৰীয় পৰ্যায়ৰ আলোচনা চক্ৰ অনুষ্ঠিত হয়| জিলা শিক্ষা আৰু প্ৰশিক্ষণ প্ৰতিষ্ঠান, ধেমাজিৰ প্ৰেক্ষাগৃহত অনুষ্ঠিত হোৱা প্ৰথম বাৰ্ষিক এই আলোচনা চক্ৰ খনিৰ বাবে দেশৰ বিভিন্ন শৈক্ষিক প্ৰতিষ্ঠানৰ শতাধিক গৱেষকে গৱেষণা পত্ৰ দাখিল কৰে|
সদৌ অসম ডায়েট বিষয়া সন্থাৰ প্ৰধান ডঃ ঋতুপৰ্ণ মহন্তৰ মঙ্গলাচৰণেৰে আৰম্ভ হোৱা অনুষ্ঠানটোত বন্তি প্ৰজ্বলন কৰে ডায়েট ধেমাজিৰ অধ্যক্ষা মৌচুমী বৰুৱা বৰদলৈয়ে| সভাৰ উদ্দেশ্য ব্যাখ্যা কৰে সদৌ অসম ডায়েট বিষয়া সন্থাৰ সভাপতি ইন্দ্ৰজিত্ গামে| আলোচনা চক্ৰখনিত বিশিষ্ট অতিথি হিচাপে উপস্থিত থাকি ভাষণ প্ৰসংগত ডিব্ৰুগড় বিশ্ববিদ্যালয়ৰ দূৰৱৰ্তী শিক্ষাৰ সঞ্চালক ডঃ লেখন গগৈয়ে ৰাষ্ট্ৰীয় শিক্ষানীতি ২০২০ ৰ সন্ধিক্ষণত শিক্ষকৰ প্ৰয়োজনীয় পৰিৱৰ্তন সম্পৰ্কে বিশদভাৱে ব্যক্ত কৰে|
আলোচন চক্ৰখনিত সমল ব্যক্তি ৰূপে উপস্থিত থকা ডিব্ৰুগড় বিশ্ববিদ্যালয়ৰ শিক্ষাতত্ব বিভাগৰ সহকাৰী অধ্যাপক ডঃ প্ৰাঞ্জল বুঢ়াগোহাঁয়ে নতুন শিক্ষানীতি ২০২০ ৰ আধাৰত কলাৰ জড়িয়তে কিদৰে শিক্ষা ব্যৱস্থাত পৰিৱৰ্তন আনিব পৰা যায় সেই সম্পৰ্কে সুন্দৰকৈ ব্যাখ্যা কৰে| উল্লেখযোগ্য যে আলোচনা চক্ৰখনিৰ বাবে সৰ্বমুঠ ১১৫ খন গৱেষণা পত্ৰ লাভ কৰা হৈছিল| ইয়াৰে ভিতৰত ৯১ খন গৱেষণা পত্ৰ অফলাইন আৰু অনলাইন যোগে গৱেষক সকলে পাঠ কৰে|
