আফগানিস্তানত পঞ্জশিৰৰ পতন। তালিবানৰ দখললৈ পঞ্জশিৰ প্ৰদেশ। চৰকাৰ গঠনৰ পিছতে তালিবানে দেশখনৰ উত্তৰাংশত থকা পঞ্জশিৰ উপত্যকা দখল কৰিছে বুলি দাবী কৰিছে। অৱশ্যে প্ৰাক্তন উপ ৰাষ্ট্ৰপতি আমৰুল্লাহ চালেহে তালিবানৰ এই দাবীক নাকচ কৰিছে। যোৱা কেইবাদিনো ধৰি আহমেদ মাছুদ আৰু প্ৰাক্তন উপ-ৰাষ্ট্ৰপতি আমৰুল্লাহ চালেহে পঞ্জশিৰ প্ৰদেশত তালিবানৰ বিৰুদ্ধে যুঁজ অব্যাহত ৰাখিছে। প্ৰথম অৱস্থাত তালিবান আৰু মাছুদ বাহিনীৰ মাজত আলোচনা হৈছিল, কিন্তু কোনো সমাধান নোলোৱাত তালিবানে পঞ্জশিৰ দখল কৰিবলৈ যুদ্ধ আৰম্ভ কৰে। অৱশেষত পঞ্জশিৰ প্ৰদেশ দখল কৰিছে বুলি দাবী কৰিছে তালিবানে। উল্লেখ্য যে, ১৯৯৬ চনৰ পৰা ২০০১ চনলৈকে আফগানিস্তানৰ শাসনভাৰ লোৱাৰ সময়তো তালিবানে নিজৰ নিয়ন্ত্ৰণলৈ আনিব পৰা নাছিল পঞ্জশিৰ।
