পাকিস্তানৰ দক্ষিণ-পশ্চিমাঞ্চলৰ বেলুচিস্তান প্ৰদেশত বুধবাৰে এটা আত্মঘাতী বোমাৰুয়ে এখন স্কুল বাছত আক্ৰমণ চলায়। তিনিগৰাকী শিশুৰ লগতে ৫জন লোক নিহত আৰু ৩৮ জন আহত হোৱাৰ খবৰ পোৱা গৈছে।
বেলুচিস্তানত দীৰ্ঘদিন ধৰি বিদ্ৰোহী কাৰ্যকলাপ চলি আহিছে। বিভিন্ন বিচ্ছিন্নতাবাদী গোটে এই অঞ্চলত আক্ৰমণ চলায়, য’ত আছে আমেৰিকাই ২০১৯ চনত সন্ত্ৰাসবাদী সংগঠন হিচাপে ঘোষণা কৰা বেলুচিস্তান লিবাৰেশ্যন আৰ্মী (বিএলএ)।
স্থানীয় উপ-আয়ুক্ত য়াছিৰ ইকবালে জনোৱা মতে, খুজদাৰ জিলাত এই আক্ৰমণ সংঘটিত হয়, য’ত বাছখনে শিশুসকলক সামৰিক বাহিনীৰ দ্বাৰা পৰিচালিত এখন স্কুললৈ লৈ গৈছিল।
কোনো গোটে তৎক্ষণাৎ এই আক্ৰমণৰ দায়িত্ব স্বীকাৰ কৰা নাই, যদিও সন্দেহৰ আঙুলি বেলুচ বিচ্ছিন্নতাবাদীৰ ওপৰত উঠিছে, যিসকলে প্ৰায়ে নিৰাপত্তা বাহিনী আৰু সাধাৰণ নাগৰিকক লক্ষ্য কৰে।
পাকিস্তানৰ গৃহমন্ত্ৰী মোহছিন নাকভিয়ে এই আক্ৰমণৰ তীব্ৰ নিন্দা কৰি শিশুৰ মৃত্যুত গভীৰ শোক প্ৰকাশ কৰিছে। তেওঁ আক্ৰমণকাৰীসকলক “পশু” বুলি অভিহিত কৰি কয় যে তেওঁলোকে নিৰ্দোষ শিশুক লক্ষ্য কৰি “নীচ বৰ্বৰতা”ৰ কাম কৰিছে আৰু তেওঁলোকৰ প্ৰতি কোনো ক্ষমা দেখুওৱা উচিত নহয়।
আন আন বিষয়াসকলে জনোৱা মতে, কেইবাজনো শিশুৰ অৱস্থা গুৰুতৰ হোৱাৰ বাবে মৃত্যুৰ সংখ্যা বৃদ্ধি পোৱাৰ আশংকা আছে।
এই শেহতীয়া আক্ৰমণৰ কেইদিনমান আগতে কিল্লাহ আব্দুল্লাহত এখন বজাৰৰ ওচৰত গাড়ী বোমা বিস্ফোৰণত চাৰিজন লোক নিহত হৈছিল।
এনে বেছিভাগ আক্ৰমণৰ দায়িত্ব বিএলএই স্বীকাৰ কৰে, যাক পাকিস্তানে ভাৰতৰ সমৰ্থনপ্ৰাপ্ত বুলি দাবী কৰে।
মাৰ্চ মাহত হোৱা এটা ভয়ংকৰ আক্ৰমণত বিএলএ বিদ্ৰোহীসকলে বেলুচিস্তানত শ শ যাত্ৰী থকা এখন ৰে’লত আক্ৰমণ চলাই ৩৩ জন লোকক হত্যা কৰিছিল, যাৰ বেছিভাগেই সৈনিক আছিল।
