উত্তৰ-পূবৰ দুৱাৰদলি গুৱাহাটী যেন পৰ্যৱসিত হৈছে অপৰাধীৰ ঘাটিলৈ। দৈনিক ইটোৰ পিছত সিটোকৈ ঘটনাই কঁপাই গৈছে মহানগৰী। হত্যা, ধৰ্ষণ, প্ৰৱঞ্চনা আদিৰ ঘটনাই দখল কৰিছে সংবাদ শিৰোনাম। কিন্তু তাৰ পিছতো অপৰাধ ৰোধ কৰাত ব্যৰ্থ হৈছে মহানগৰ আৰক্ষী। স্মাৰ্ট আৰক্ষীৰে গিজগিজাই থকা মহানগৰীত এইবাৰ সংঘটিত হ’ল চাঞ্চল্যকৰ ঘটনা। ৰাজপথৰ পৰা টানি চোঁচৰাই যুৱতীক অপহৰণ কৰিলে দুৰ্বৃত্তই।
মহানগৰীৰ ৩৭নং ৰাষ্ট্ৰীয় ঘাইপথত সংঘটিত হৈছে চাঞ্চল্যকৰ ঘটনা। ৰাজপথৰ পৰা টানি চোঁচৰাই যুৱতীক অপহৰণ কৰিলে দুৰ্বৃত্তই। যুৱক আৰু মহিলাৰ দল এটাই সংঘটিত কৰে এই ঘটনা। প্ৰথমে যুৱতীগৰাকীক শাৰীৰিকভাৱে প্ৰহাৰ কৰে দুৰ্বৃত্তৰ দলটোৱে। তাৰ পিছত এখন গাড়ীত যুৱতীক বলপূৰ্বকভাৱে উঠাই পলায়ন। কেমেৰাৰ সন্মুখতে সংঘটিত হয় সমগ্ৰ ঘটনা। নিশা বশিষ্ঠ চাৰিআলি উৰণ সেঁতুৰ তলত ঘটে এই ঘটনা।
