নাৰী সবলীকৰণ আৰু স্বাৱলম্বিতাৰ উজ্জ্বল নিদৰ্শন দাঙি ধৰি বিশ্বৰ সৌন্দৰ্যৰ মঞ্চত জিলিকিল অসমৰ জীয়ৰী সাগৰিকা কাকতি বৰুৱা। বিশ্বৰ ভিতৰতে অত্যাধুনিক আৰু ৰাজকীয় ৰাষ্ট্ৰ ইউনাইটেড আৰব এমিৰেটচ্(UAE) ডুবাইত শেহতীয়াকৈ অনুষ্ঠিত হোৱা বিশ্ব সৌন্দৰ্য প্ৰতিযোগিতা মিছেছ্ ইউনিভাৰ্চ ইউ এ ই ২০২১ৰ শীৰ্ষ ৰানাৰ-আপ্ বিশ্ব-সুন্দৰী খিতাপ অৰ্জন কৰি অসমবাসীক গৌৰৱান্বিত কৰিলে ভাৰতৰ হৈ প্ৰতিনিধিত্ব কৰা নগাঁৱৰ বোৱাৰী সাগৰিকাই।
মিছেছ্ ইউনিভাৰ্চ ইউ এ ই বিশ্ব সৌন্দৰ্য প্ৰতিযোগিতাৰ মঞ্চত অসমীয়া জাতীয় সাজ-পাৰ মেখেলা-চাদৰ পৰিধান কৰি হাতত শৰাই লৈ অসমীয়া বোৱাৰীৰ পূৰ্ণাংগ ৰূপেৰে ৰেম্পত খোজ দি বিশ্বৰ বিভিন্ন প্ৰান্তৰ সমবেত হাজাৰ হাজাৰ দৰ্শকক পলকতে মোহাচ্ছন্ন কৰি তুলিছিল অসম কন্যা সাগৰিকা কাকতিয়ে।
অসমৰ চহকী হাতে-বোৱা চাদৰ-মেখেলা আৰু সাগৰিকাৰ ৰূপ-লাবন্যত বহু সময় ধৰি বাজি উঠিছিল দৰ্শকৰ বিপূল হাতচাপৰি আৰু অৱশেষত জাৰ্মান, ছাইবেৰীয়া, ইৰাণ, পাকিস্তান, ব্ৰাজিল, ইউ-কে আৰু ৰাছিয়া আদিকে ধৰি বিশ্বৰ মুঠ ২৫ খন দেশৰ পৰা নিৰ্বাচিত হোৱা ২৫ গৰাকী চূড়ান্ত প্ৰতিযোগীৰ ভিতৰত অসমৰ মেখেলা-চাদৰ পৰিহিতা সাগৰকাই আজুৰি আনিলে প্ৰথম ৰানাৰ-আপৰ শ্ৰেষ্ঠত্বৰ গৌৰৱ।
প্ৰায় ১৪ বছৰ ধৰি ডুবাইত বসবাস কৰি অহা সাগৰিকা এগৰাকী তিনি বছৰীয়া কন্যা সন্তানৰ মাতৃ। অসমৰ চাহৰ কথা সততে বিদেশত কৈ ভাল পোৱা সাগৰিকাই নিজৰ অনুভৱ ব্যক্ত কৰি কয়, “বিদেশত থাকি অসমৰ কৃষ্টি-সংস্কৃতি তথা জাতীয় ভাৱধাৰাক বিশ্বৰ আন ৰাষ্ট্ৰসমূহৰ সৈতে বিনিময় কৰিবলৈ পাই নিজকে সৌভাগ্যবান যেন অনুভৱ হৈছে।”উল্লেখযোগ্য যে, মিছেছ ইউনিভাৰ্চ ইউ এ ইৰ খিতাপ অৰ্জন কৰিলে জাৰ্মানীৰ বিশ্ব সুন্দৰী মিছেছ্ মেৰিনা ভন লিজাই।
