চলিত আই পি এলত এতিয়ালৈকে সৰ্বাধিক মেচত জয়ী হৈ পইণ্ট তালিকাৰ শীৰ্ষস্থানত থকা ৰাজস্থান ৰয়েলছে কাইলৈ সৱাই মানসিং ষ্টেডিয়ামত ছিজনৰ অষ্টমখন খেলত মুম্বাই ইণ্ডিয়ানছৰ বিৰুদ্ধে খেলিব৷ ইয়াৰপূৰ্বে ৰয়েলছে ৱাংখেড়েত খেলা মেচত অসম সন্তান ৰিয়ানৰ ৩৯ বলত অপৰাজিত ৫৪ ৰাণৰ চমকপ্ৰদ ইনিংছৰ সহায়ত মুম্বাই ইণ্ডিয়ানছক পৰাস্ত কৰিছিল৷ সাত খন মেচৰ ছখনত জয়ী হৈ ১২ পইণ্ট অৰ্জন কৰা ৰাজস্থান ৰয়েলছ কাইলৈৰ মেচক লৈও দৃঢ়তাৰে সাজু বুলি আজি সংবাদমেলত ব্যক্ত কৰে দলটোৰ অপেনাৰ জ’ছ বাটলাৰে৷
‘আমি ইতিমধ্যে লীগৰ অৰ্ধেক সংখ্যক মেচ খেলিলো লগতে প্ৰত্যাশিত সফলতাৰে শীৰ্ষস্থানতো আছো৷ দলৰ এই সফলতাত সকলোৰে অৰিহনা আছে৷ যোৱা ছিজনতো আমাৰ আৰম্ভনি সুন্দৰ হৈছিল৷ কিন্তু মধ্যভাগৰ পৰা আমি বিফলতা পাইছিলো যাৰবাবে প্লে-অফলৈ যোগ্যতা অৰ্জনত ব্যৰ্থ হৈছিলো৷ এইবাৰ আমি এইদিশত মনোনিৱেশ কৰিছো৷ বাকী থকা সাতখন মেচতো আমি আমাৰ ধাৰাবাহিকতা ৰক্ষা কৰিবলৈ বধ্য পৰিকৰ৷’ বাটলাৰে ব্যক্ত কৰে৷
উল্লেখ্য যে ৰাজস্থান ৰয়েলছে কাইলৈ ৰয়পুৰত চলিত ছিজনৰ অন্তিম মেচখন খেলিব৷ মুম্বাই ইণ্ডিয়ানছৰ বিৰুদ্ধে খেলাৰ পাছতে ৰয়েলছে চাৰিখন মেচ ক্ৰমে লক্ষ্ণৌ, হায়দৰাবাদ, নতুন দিল্লী আৰু চেন্নাইত খেলিব৷ অৱশ্যে চলিত ছিজনত ৰাজস্থান ৰয়েলছে বাহিৰত খেলা মেচৰ সফলতা এশ শতংশ৷ দলে মুম্বাই ইণ্ডিয়ানছৰ লগতে পঞ্জাৱ কিংছ আৰু কলকাতা নাইট ৰাইডাৰ্ছৰ বিৰুদ্ধে বিপক্ষৰ ঘৰত খেলি জয়লাভ অৰ্জন কৰিছে৷ অন্তিম মেচত বাটলাৰৰ বিস্ফোৰক শতকৰ জড়িয়তে ইডেন গাৰ্ডেনত ৰয়েলছে ৰাণ অনুসৰণৰ অভিলেখ গঢ়ি কে কে আৰক পৰাস্ত কৰিছিল৷
‘বাহিৰত খেলা মেচৰ সফলতাই দলক পৰবৰ্তী সফলতাৰ বাবে মানসিক শক্তি আৰু অনুপ্ৰেৰণা দিয়ে৷ এইবাৰ আমি তিনিটা শক্তিশালী দলক তেওঁলোকৰ ঘৰতে পৰাস্ত কৰিবলৈ সক্ষম হৈছো৷ এই সফলতাত দলৰ বেটাৰৰ লগতে বলাৰৰ অৰিহনাও আছিল অন্যতম৷ সেয়ে অনাগত চাৰিখন মেচ বাহিৰত খেলাক লৈ আমি চাপত নাই৷ আমি দলীয় শক্তিৰ ওপৰত বিশ্বাসী৷ বেটিঙত মিডল অৰ্ডাৰৰ মজবুত স্থিতি তথা বলিঙত পেচা-স্পীনাৰৰ অভিজ্ঞতা দলৰ ভাৰসাম্য ৰক্ষাত সহায় কৰিছে, যাৰবাবে আমি সফলতা লাভ কৰিছো৷’ ইংলণ্ডৰ তাৰকা ক্ৰিকেটাৰগৰাকীয়ে লগতে কয়৷
উল্লেখ্য যে ইণ্ডিয়ান প্ৰিমিয়াৰ লীগৰ প্ৰথম ছিজনৰ চেম্পিয়ন ৰাজস্থান ৰয়েলছে চলিত ১৭ সংখ্যক আই পি এলৰ অন্তিম দুখন ঘৰুৱা মেচ গুৱাহাটীত খেলিব৷ সঞ্জু ছেমছন নেতৃত্বত ৰাজস্থান ৰয়েলছে অহা ১৫ মে’ত গুৱাহাটীৰ প্ৰথম মেচত পঞ্জাৱ কিংছৰ বিৰুদ্ধে খেলাৰ বিপৰীতে অহা ১৯ মে’ত এচিএ ক্ৰিকেট ষ্টেডিয়ামত দলটো মুখামুখি হ’ব কলকাতা নাইট ৰাইডাৰ্ছৰ৷ গুৱাহাটীৰ দূয়োখন মেচে নৈশালোকত অনুষ্ঠিত হ’ব৷
