ৰাছিয়া আৰু জাপানৰ মাজত বিতৰ্কিত কুৰিল দ্বীপপুঞ্জক লৈ পুনৰ উত্তেজনা বৃদ্ধি পাইছে। ৰাছিয়াই জাপানৰ দাবী থকা এই দ্বীপপুঞ্জত এক বৃহৎ পৰিসৰৰ সামৰিক অনুশীলন চলাইছে য’ত পাৰমাণৱিক শক্তিৰে চালিত চাবমেৰিন আৰু গাইডেড মিছাইল ক্ৰুজাৰ অন্তৰ্ভুক্ত কৰা হৈছে। বৃহস্পতিবাৰে ৰাছিয়াৰ পেচিফিক ফ্লিটে এটৰোফু (Etorofu) দ্বীপৰ পৰা বাষ্টিয়ন এন্টি-শ্বিপ মিছাইল নিক্ষেপ কৰি প্ৰায় ৩০০ কিলোমিটাৰ দূৰৈৰ শত্ৰুৰ জাহাজৰ লক্ষ্যত সফলতাৰে আঘাত হানে। ৰাছিয়াৰ ৰাষ্ট্ৰপতি ভ্লাদিমিৰ পুটিনে যোৱা সপ্তাহত এই দ্বীপটো ভ্ৰমণ কৰাৰ ঠিক পিছতেই এই সামৰিক কচৰৎ আৰম্ভ হোৱাটোৱে বিশেষ তাৎপৰ্য বহন কৰিছে। এই অনুশীলনত প্ৰায় ৬০ খন যুদ্ধজাহাজ, ৩০ খন বিমান, হেলিকপ্তাৰ, ড্ৰোন আৰু ১৩ হাজাৰৰো অধিক সৈন্যই অংশগ্ৰহণ কৰিছে।
জাপানে এই কাৰ্যকলাপৰ তীব্ৰ বিৰোধিতা কৰিছে। জাপানৰ বৈদেশিক মন্ত্ৰী তোছিমিটছু মোটেগীয়ে ৰাছিয়াৰ এই সামৰিক শক্তি বৃদ্ধিৰ প্ৰচেষ্টাক গ্ৰহণযোগ্য নহয় বুলি স্পষ্ট কৰি দিছে। জাপানে এই দ্বীপসমূহক ‘নৰ্দাৰ্ন টেৰিটৰীজ’ (Northern Territories) বুলি কয়, আনহাতে ৰাছিয়াই ইয়াক কুৰিল দ্বীপপুঞ্জৰ অংশ বুলি দাবী কৰে। দ্বিতীয় বিশ্বযুদ্ধৰ অন্তত ছোভিয়েট ইউনিয়নে এই দ্বীপসমূহত নিয়ন্ত্ৰণ সাব্যস্ত কৰাৰ পিছৰে পৰা দুয়োখন দেশৰ মাজত এই অঞ্চলটোক লৈ দীৰ্ঘদিনীয়া বিবাদ চলি আহিছে। অহা ২৯ আগষ্টলৈকে চলিবলগীয়া ৰাছিয়াৰ এই সামৰিক অনুশীলনে এতিয়া দুয়োখন দেশৰ মাজত সংঘাত আৰু যুদ্ধৰ আশংকা অধিক ঘনীভূত কৰি তুলিছে।
