বিধানসভা নিৰ্বাচন পিছুৱাবলৈ দাবী জনাইছে পঞ্জাৱৰ মুখ্যমন্ত্ৰী চৰণজিৎ সিং চান্নীয়ে। অহা ১৪ ফেব্ৰুৱাৰীত গুৰু ৰবিদাস জয়ন্তীৰ বাবে ৰাজ্যখনত বিধানসভা নিৰ্বাচনৰ দিন ৬দিন পিছুওৱাবলৈ দাবী জনাই নিৰ্বাচন আয়োগলৈ পত্ৰ প্ৰেৰণ কৰিছে মুখ্যমন্ত্ৰী চিন্নীয়ে। উল্লেখ্য যে, ৰাজ্যখনৰ ১১৭টা বিধানসভা সমষ্টিত অহা ১৪ ফেব্ৰুৱাৰীত নিৰ্বাচন অনুষ্ঠিত হ’ব বুলি নিৰ্বাচন আয়োগে ইতিমধ্যে ঘোষণা কৰিছে। নিৰ্বাচনৰ ফলাফল ঘোষণা কৰা হ’ব অহা ১০ মাৰ্চত। মুখ্য নিৰ্বাচন আয়ুক্ত সুশীল চন্দ্ৰলৈ প্ৰেৰণ কৰা পত্ৰত মু্খ্যমন্ত্ৰী চান্নীয়ে উল্লেখ কৰে যে অহা ১৬ ফেব্ৰুৱাৰীত গুৰু ৰবিদাসৰ জন্ম বাৰ্ষিকী। ৰাজ্যখনৰ ৩২ শতাংশ লোকেই অনুসূচীত জাতি হোৱা হেতুকে পিছুৱাই দিয়া উচিত বুলি মুখ্যমন্ত্ৰীয়ে কয়। অৱশ্যে, এতিয়ালৈকে নিৰ্বাচন আয়োগে কোনো সিদ্ধান্ত প্ৰকাশ কৰা নাই।
