ভাৰত-ম্যানমাৰ সীমান্তত ড্ৰাগছ বিৰোধী অভিযানত অৰুণাচল আৰক্ষীয়ে এক উল্লেখযোগ্য সফলতা লাভ কৰিছে। বৃহস্পতিবাৰে অৰুণাচল প্ৰদেশৰ নামপঙ অঞ্চলত নামপঙ আৰক্ষী আৰু স্পেচিয়াল টাস্ক ফ’ৰ্চ (STF)-ৰ যৌথ দলে অভিযান চলাই এজন ম্যানমাৰ নাগৰিকক আটক কৰে।
আটকাধীন ব্যক্তিজনৰ নাম লাহো কাইটা কৈচান (৪০) বুলি জানিব পৰা গৈছে। বিশেষ সূত্ৰৰ ভিত্তিত চলোৱা এই অভিযানত অভিযুক্তজনক ভাৰতীয় সীমান্তত অবৈধভাৱে প্ৰৱেশৰ চেষ্টা কৰি থকা অৱস্থাত সুৰক্ষা বাহিনীয়ে আটক কৰে।
তালাচী অভিযানৰ সময়ত তেওঁৰ দখলৰ পৰা প্ৰায় ৪২০.৫ গ্ৰাম সন্দেহযুক্ত কানি (অপিয়াম) আৰু নগদ ১ লাখ টকা উদ্ধাৰ কৰা হয়। উদ্ধাৰ হোৱা মাদক দ্ৰব্য আৰু নগদ ধন আইনী প্ৰক্ৰিয়াৰে জব্দ কৰা হৈছে।
আৰক্ষী সূত্ৰে জানিবলৈ দিয়া মতে, সীমান্তত অনুপ্ৰৱেশ আৰু ড্ৰাগছ সৰবৰাহ ৰোধৰ বাবে কটকটীয়া নজৰদাৰীৰ মাজতে এই অভিযান চলোৱা হৈছিল। তদন্তকাৰী সংস্থাই সন্দেহ প্ৰকাশ কৰিছে যে অভিযুক্তজন কোনো বৃহৎ আন্তঃৰাজ্যিক বা আন্তঃৰাষ্ট্ৰীয় ড্ৰাগছ চক্ৰৰ সৈতে জড়িত থাকিব পাৰে।
ঘটনাটোৰ সৈতে জড়িত হৈ অভিযুক্তজনৰ বিৰুদ্ধে NDPS Act, Immigration Act আৰু Foreigners Act-ৰ সংশ্লিষ্ট ধাৰাত গোচৰ ৰুজু কৰা হৈছে। বৰ্তমান ঘটনাটোৰ অধিক তদন্ত অব্যাহত আছে।
