এজন চীনাবাদাম বিক্ৰেতা বিগত দিনকেইটাত ছ’চিয়েল মিডিয়াত ভাইৰেল হৈ পৰিছে। পশ্চিম বংগৰ কেঁচা চিনাবাদাম বেচিবলৈ সৃষ্টি কৰা এটা গান কেইবাজনো লোকে ৰেকৰ্ড কৰি ফেচবুক, ইনষ্টাগ্ৰাম ৰিল আৰু ইউটিউবৰ দৰে ছ’চিয়েল মিডিয়া ছাইটত আপলোড কৰিছিল। ইয়াৰ পিছতে দেশজুৰি মুহূৰ্তৰ ভিতৰতে ভাইৰেল হৈছিল বাদাম বেচোতাজন। গানটো ভাইৰেল হোৱাৰ পিছত মানুহে ইয়াক ৰিমিক্স কৰা আৰম্ভ কৰে আৰু সেইটো ছচিয়েল মিডিয়াত আপলোড কৰে। আনকি মমতা বেনাৰ্জীয়েও ধেমালিৰ বাবে তৈয়াৰ কৰা কিছুমান ৰিমিক্সত অভিনয় কৰিছিল।
কিন্তু এই খ্যাতিত সুখী নহয় ভুৱন বাদয়কাৰ আৰু আপলোড কৰাসকলৰ বিৰুদ্ধে অভিযোগ উত্থাপন কৰি গোচৰ ৰুজু কৰিছে। পশ্চিম বংগৰ বীৰভূম অঞ্চলৰ বাদাম বিক্ৰেতাজনে সমীপৰ ডুব্ৰাজপুৰ থানাৰ কাষ চাপিছে। তেওঁৰ অভিযোগ-ভাইৰেল গানৰ পৰা আন লোকে লাখ লাখ উপাৰ্জন কৰিছে, কিন্তু তেওঁৰ মুঠেও লাভ হোৱা নাই। ভুৱন বাদয়কাৰে কয় যে তেওঁৰ গানটো ইতিমধ্যে ছ’চিয়েল মিডিয়াত ভাইৰেল হৈ পৰিছে আৰু বহু লোকে এই গানটো ইউটিউবত শ্বেয়াৰ কৰি ধন উপাৰ্জন কৰিছে। কিন্তু সেইবোৰৰ পৰা তেওঁ একো লাভ কৰা নাই। আনকি কিছুমান লোকে ইউটিউবত একেটা আপলোড কৰাৰ সময়ত গানটোত স্বত্ত্বাধিকাৰ যোগ দিছে, যিটো তেওঁলোকে কেৱল পথত গাই থাকোতে ৰেকৰ্ড কৰিছিল। তেওঁক গানটোৰ স্ৰষ্টাৰ কৃতিত্ব নিদিয়াকৈ গানটো ভাইৰেল হোৱাৰ পিছত বহুলোকে গানটো গাই আছে আৰু নিজৰ নিজৰ ছ’চিয়েল মিডিয়া একাউণ্টত সেইটো আপলোড কৰাৰ অভিযোগ।
তেওঁ দাবী কৰিছে যে আৰক্ষীয়ে গোচৰটোৰ তদন্ত কৰিব, আৰু তেওঁ প্ৰাপ্য ভিডিঅ’বোৰৰ পৰা ধন প্ৰাপ্ত কৰাত সহায় কৰিব। ভুৱন বাদয়কাৰে কয় যে আনসকলে তেওঁৰ গান ব্যৱহাৰ কৰি লাখ লাখ উপাৰ্জন কৰি থকাৰ সময়ত, তেওঁৰ হাত খালী হৈ আছে। গানটো ভাইৰেল হোৱাৰ পিছত বহু লোকে তেওঁৰ ঘৰত ভিৰ কৰিছে। সকলোৱে মোৰ গানৰ এটা ভিডিঅ’ বনাব বিচাৰে। তাৰ পিছত, তেওঁলোকে গানটো ইণ্টাৰনেটত আপলোড কৰি যথেষ্ট ধন উপাৰ্জন কৰিছে। কিন্তু মোৰ হাত এতিয়াও খালীয়েই হৈ আছে। ইয়াৰ লগতে তেওঁ অভিযোগ কৰে যে তেওঁৰ জীৱনলৈ শংকা নামি আহিছে, কিয়নো অনবৰতে তেওঁৰ গানটো ৰেকৰ্ড কৰিবলৈ আহি থাকে। থানাত কথিত অভিযোগ দাখিল কৰিবলৈ থানালৈ যাওঁতে হেলমেট পৰিধান কৰি যাব লগা হৈছিল। তাৰ পিছতো একাংশই চিনি পাইছিল আৰু মোৰ ফটো তুলিবলৈ আৰম্ভ কৰিছিল।
উল্লেখ্য যে, গানটো ভাইৰেল হোৱাৰ পিছত তেওঁ ইমানেই জনপ্ৰিয় হৈ পৰিছিল যে স্থানীয় বিজেপি বিধায়ক অনুপ সাহাইও তেওঁৰ ঘৰলৈ গৈছিল আৰু প্ৰয়োজন হোৱা সকলো সহায়ৰ প্ৰতিশ্ৰুতি দিছিল। ইয়াৰ পিছতে শাসনাধিষ্ঠ TMC নেতৃত্বও আগবাঢ়ি আহে আৰু আশ্বাস দিয়ে যে তেওঁ মমতা বেনাৰ্জী চৰকাৰে ঘোষণা কৰা শিল্পীসকলৰ বাবে অনুদান লাভ কৰিব। মন কৰিবলগীয়া যে, ভুৱন বাদয়াকাৰে লিখা আৰু ৰচনা কৰা গানটোত এইবুলি কোৱা হৈছে যে, তেওঁৰ সৈতে কেৱল কেঁচা চীনাবাদামহে উপলব্ধ আৰু তেওঁ ভজা বাদাম বিক্ৰী নকৰে। উল্লেখ্য যে, বীৰভূম জিলাৰ প্ৰান্তে প্ৰান্তে ঘূৰি ফুৰি ভুৱনে কেঁচাবাদাম বিক্ৰী কৰে আৰু বাদামৰ বিনিময়ত পুৰণি মোবাইল ফোন, গহণা বা অন্যান্য সামগ্ৰী গ্ৰহণ কৰে।
