পাকিস্তানৰ হিন্দু মন্দিৰত পুনৰবাৰ আক্ৰমণ কৰা হৈছে। পাকিস্তানৰ সংখ্যালঘু জনসাধাৰণৰ ওপৰত হোৱা অত্যাচাৰৰ বাবে এনে আক্ৰমণ কোনো নতুন ঘটনা নহয়। শেহতীয়াকৈ পাকিস্তানৰ এটা দুষ্কৃতিকাৰীৰ দলে কৰাচীৰ সিন্ধু প্ৰদেশত থকা এটা হিন্দু মন্দিৰত আক্ৰমণ কৰে। আক্ৰমণত সমগ্ৰ মন্দিৰটো ধ্বংস হৈ পৰিছে। মন্দিৰৰ গৰ্ভগৃহটো ভাঙি চুৰমাৰ কৰে দুৰ্বৃত্তৰ দলটোৱে।
জানিব পৰা মতে, ঘটনাটো পাকিস্তানৰ বন্দৰ চহৰৰ পাঁচ নম্বৰ কোৰাংগী অঞ্চলত সংঘটিত হৈছে। এই ঘটনাটোক লৈ এতিয়া আতংকিত হৈ পৰিছে পাকিস্তানৰ সংখ্যালঘু সম্প্ৰদায়ৰ লোকসকল।
উক্ত মন্দিৰটো অঞ্চলটোৰ এটা বিখ্যাত মন্দিৰ। সেই মন্দিৰতে দুৰ্বৃত্তই আক্ৰমণ কৰে। কেৱল মন্দিৰতে নহয়, পুৰোহিতৰ ঘৰটো আক্ৰমণ কৰে দুৰ্বৃত্তৰ দলটোৱে। বৰ্তমানলৈকে পাকিস্তান আৰক্ষীয়ে ঘটনাটো সন্দৰ্ভত কোনো অভিযুক্তক গ্ৰেপ্তাৰ কৰা নাই।
কোৰাংগীৰ এছএইচঅ’ ফাৰুক সঞ্জৰানীয়ে কয় যে স্থানীয় লোকসকলৰ বিবৃতি অনুসৰি, সম্পূৰ্ণ ঘটনাটোত ছয়ৰ পৰা আঠজন অভিযুক্ত আছে। এটা হিন্দু মন্দিৰত দলটোৱে আক্ৰমণ কৰা সন্দৰ্ভত এটা গোচৰ ৰুজু কৰা হৈছে। আৰক্ষীয়ে তদন্ত কৰি আছে। লগতে তেওঁ কয় যে, আটাইকেইজন অভিযুক্ত সোনকালেই গ্ৰেপ্তাৰ কৰা হ’ব।
