সমগ্ৰ হাস্পতালখন অন্ধকাৰত ডুব গৈছিল। বিদ্যুৎ নাই, আনকি হাস্পতালৰ জেনেৰেটৰো বিকল! চিকিৎসকসকলে চিকিৎসাৰ বাবে মমবাতিৰ পোহৰ বা টৰ্চৰ ওপৰত নিৰ্ভৰ কৰিবলগীয়া হয়! উত্তৰ প্ৰদেশৰ বালিয়াৰ চৰকাৰী হাস্পতালত প্ৰায় ৪৫ মিনিট ধৰি এইদৰে চিকিৎসা চলিছিল।
ঘটনাটো সংঘটিত হৈছিল শুকুৰবাৰে। কিন্তু এই ঘটনাৰ ভিডিঅ’ ভাইৰেল হোৱাৰ পিছতহে বিষয়টো পোহৰলৈ আহে। হাস্পতালৰ অধীক্ষক এছ কে যাদৱে পিটিআইক জনোৱা মতে, জেনেৰেটৰত যান্ত্ৰিক ত্ৰুটিৰ সৃষ্টি হৈছিল। মেৰামতিৰ চেষ্টা কৰা হৈছিল, কিন্তু সফল হোৱা নাছিল। অধীক্ষকৰ মতে, “সেই পৰিস্থিতিত বাধ্য হৈ চিকিৎসকসকলে টৰ্চৰ পোহৰত চিকিৎসা কৰিছিল। সম্ভৱতঃ সেই সময়ত কোনোবাই ভিডিঅ’ ৰেকৰ্ড কৰিছিল।”
ভিডিঅ’ ভাইৰেল হোৱাৰ পিছত সমালোচনাৰ ধুমুহাৰ সৃষ্টি হয়। হাস্পতালৰ জৰুৰী বিভাগত বিকল্প ব্যৱস্থা কিয় নাই, তাক লৈ প্ৰশ্ন উত্থাপিত হয়। এই ঘটনাৰ পিছত হাস্পতাল কৰ্তৃপক্ষই জৰুৰী বিভাগৰ বাবে ‘ইনভাৰ্টাৰ’ৰ ব্যৱস্থা কৰে।
