নগাঁও-মাকুমৰ ছোৱালী দলে গুৱাহাটীৰ ভেটাপাৰাৰ মৌলানা মহম্মদ তয়াবুল্লাহ হকী ষ্টেডিয়ামত চলি থকা খেলো ইণ্ডিয়া অস্মিতা ৰাজ্যিক হকী লীগৰ জুনিয়ৰ শাখাৰ ফাইনেলত প্ৰৱেশ কৰিছে৷ আজি প্ৰতিযোগিতাৰ অন্তিম চাৰিখন লীগৰ খেল অনুষ্ঠিত হোৱাৰ পাছত মাকুমে গ্ৰুপ ‘এ’ৰ শীৰ্ষ দল হিচাপে তথা নগাঁও দলে গ্ৰুপ ‘বি’ৰ শ্ৰেষ্ঠ হৈ খিতাপৰ যুঁজলৈ অগ্ৰসৰ হয়৷
কাইলৈ পূৱা ৯.৩০ বজাত ফাইনেল খেলখন অনুষ্ঠিত হ’ব আৰু মেচৰ অন্তত অসমৰ ক্ৰীড়ামন্ত্ৰী নন্দিতা গাৰ্লোছাই চেম্পিয়ন দলক ট্ৰফী প্ৰদান কৰিব বুলি অসম হকীৰ সম্পাদক তপন দাসে জনাইছে৷ ইফালে, ফাইনেল মেচৰ পূৰ্বে তৃতীয়স্থান নিৰ্ধাৰণকাৰী খেলখন পূৱা আঠ বজাত অনুষ্ঠিত হ’ব৷ গ্ৰুপ ‘এ’ আৰু ‘বি’ৰ দ্বিতীয় স্থানত থকা দল নাহৰকটীয়া আৰু তেজপুৰৰ মাজত এই মেচখন অনুষ্ঠিত হ’ব৷
উল্লেখ্য যে ভাৰতীয় ক্ৰীড়া প্ৰাধিকৰণৰ সহযোগত অসম হকীয়ে আয়োজন কৰা প্ৰাইজমানি প্ৰতিযোগিতাখনত ছোৱালীৰ জুনিয়ৰ শাখাৰ লগতে¸ ছাব-জুনিয়ৰৰ খেলো অনুষ্ঠিত হৈছে৷ কাইলৈ আবেলিৰ পৰা ছাব-জুনিয়ৰৰ লীগৰ খেল অনুষ্ঠিত হ’ব৷ জুনিয়ৰ শাখাৰ দৰে ছাব-জুনিয়ৰ শাখাতো আঠটা দলে অংশগ্ৰহণ কৰিছে৷ দুটা গ্ৰুপত দলকেইটাক ভাগ কৰি শীৰ্ষ দুটাই অহা ২৬ মাৰ্চত ফাইনেল খেলিব৷
