ল’জান ডায়মণ্ড লীগত ৮৮.০৫ মিটাৰ দূৰলৈ জেভলিন নিক্ষেপ কৰি ছিজনৰ শ্ৰেষ্ঠ প্ৰদৰ্শন নীৰজৰ; ৮৮.১৪ মিটাৰেৰে স্বৰ্ণ জয় শ্ৰীলংকাৰ ৰুমেশ পথিৰাগেৰ
ল’জান ডায়মণ্ড লীগত ৰূপৰ পদকতে সন্তুষ্ট থাকিবলগীয়া হ’ল ভাৰতৰ তাৰকা জেভলিন থ্ৰ’ৱাৰ নীৰজ চোপ্ৰা। ৮৮.০৫ মিটাৰ দূৰলৈ জেভলিন নিক্ষেপ কৰি চলিত ছিজনৰ শ্ৰেষ্ঠ প্ৰদৰ্শন আগবঢ়ালেও মাত্ৰ ৯ ছেণ্টিমিটাৰৰ ব্যৱধানত স্বৰ্ণ পদক হেৰুৱালে নীৰজে।
প্ৰতিযোগিতাখনত শ্ৰীলংকাৰ ৰুমেশ থাৰংগা পথিৰাগেই ৮৮.১৪ মিটাৰ দূৰত্বলৈ জেভলিন নিক্ষেপ কৰি স্বৰ্ণ পদক জয় কৰে। পথিৰাগেৰ এই প্ৰদৰ্শনে তেওঁক নীৰজৰ পৰা ৯ ছেণ্টিমিটাৰ আগুৱাই ৰাখে।
ইফালে, নীৰজৰ বাবে ৮৮ মিটাৰৰ সীমা অতিক্ৰম কৰাটো চলিত ছিজনৰ এক গুৰুত্বপূৰ্ণ ইতিবাচক দিশ হিচাপে বিবেচিত হৈছে। ছিজনৰ আৰম্ভণিতে প্ৰত্যাশিত প্ৰদৰ্শন আগবঢ়াব নোৱাৰাৰ পাছত ল’জানত নীৰজে নিজৰ ছিজনৰ শ্ৰেষ্ঠ প্ৰদৰ্শন আগবঢ়াবলৈ সক্ষম হয়।
অৱশ্যে এই ফলাফলৰ পাছতো নীৰজৰ জয়ৰ অপেক্ষা অব্যাহত থাকিল। ২০২৫ চনৰ জুলাইত বেংগালুৰুত অনুষ্ঠিত Neeraj Chopra Classic-ত জয়লাভ কৰাৰ পাছত এতিয়ালৈকে তেওঁ কোনো প্ৰতিযোগিতাত স্বৰ্ণ জয় কৰিব পৰা নাই।
ল’জানৰ ৰূপৰ পদকে নীৰজৰ ফৰ্ম ঘূৰি অহাৰ স্পষ্ট ইংগিত দিছে যদিও স্বৰ্ণৰ পৰা মাত্ৰ ৯ ছেণ্টিমিটাৰ দূৰত থমকি ৰ’বলগীয়া হোৱাটো তেওঁৰ বাবে নিশ্চিতভাৱে হতাশাজনক ফলাফল।
