গুৱাহাটী, ২৯ জুন, NKTV: অসমৰ মুখ্যমন্ত্ৰী ড০ হিমন্ত বিশ্ব শৰ্মাই মঙলবাৰে কয় যে, অসমৰ সংখ্যালঘু প্ৰধান ৰাজনৈতিক দলসমূহে ৰাজ্যখনৰ বৰ্ধিত জনসংখ্যাৰ ওপৰত আজিলৈকে কোনো মাত মতা নাই। ৰাজ্যখনত বৰ্ধিত ইছলামিক জনসংখ্যা সন্দৰ্ভত সংবাদ মাধ্যমক সম্বোধন কৰি মুখ্যমন্ত্ৰী হিমন্ত বিশ্ব শৰ্মাই আজি এই মন্তব্য কৰে। জুলাইত ৰাজ্যখনৰ ৰাজনৈতিক দলসমূহৰ সৈতে মুখ্যমন্ত্ৰীৰ উপস্থিতিত এখন বৈঠক অনুষ্ঠিত হ’ব।
ইয়াৰ পূৰ্বে, মুখ্যমন্ত্ৰী শৰ্মাই এক বিবৃতি দিছিল য’ত তেওঁ ৰাজ্যখনৰ মুছলমানসকলক জনসংখ্যা নিয়ন্ত্ৰণৰ বাবে এক ‘উপযুক্ত পৰিয়াল পৰিকল্পনা নীতি’ গ্ৰহণ কৰিবলৈ আহ্বান জনাইছিল।
মুখ্যমন্ত্ৰী শৰ্মাই কয়, “আমি সংখ্যালঘু মুছলমান সম্প্ৰদায়ৰ বাবে জনসংখ্যাৰ বোজা হ্ৰাস কৰিবলৈ অধিক কাম কৰিব বিচাৰো। আমি তেওঁলোকৰ সৈতে একেলগে কাম কৰিব বিচাৰো যাতে ৰাজ্যখনৰ জনসংখ্যা নিয়ন্ত্ৰণ হয়। জনসংখ্যা হৈছে দৰিদ্ৰতা, ভূমি বেদখলৰ দৰে সামাজিক সমস্যাৰ সৃষ্টিৰ মূল কাৰণ। আৰু জনসংখ্যা হ্ৰাস হ’লেহে আমি এই সামাজিক সমস্যা সমূহ সমাধান কৰিব পাৰিম।”
